Б.ТӨГС Авлигатай тэмцэх газар цагдаагийн байгууллагатай хамтран ажлын хэсэг байгуулж хуулийн байгууллагуудаас илэрсэн авлигын шинжтэй хэргүүдийг мөрдөн шалгаж байна. Тухайлбал, Хан-Уул дүүргийн Цагдаагийн I хэлтсийн Мөрдөн байцаах тасгийн дарга, хошууч Г.Алтан-Очир болон Шүүхийн шинжилгээний үндэсний хүрээлэнгийн зарим шинжээч нарыг авлигын гэмт хэрэгт холбогдуулан яллагдагчаар татаж, цагдан хорьжээ. Хэргийн учрыг тайлахад чухал үүрэгтэй оролцдог шинжээчид зориудаар худал дүгнэлт гаргаж, хариуд нь авлига, хээл хахууль авсан нь тогтоогджээ. Өөрөөр хэлбэл, хууль, шүүхийн байгууллагууд дунд үүссэн авлига, хээл хахуулийн бохир сүлжээнд АТГ нэвтрэхээс аргагүй болсон бололтой. Тус байгууллагад энэ төрлийн гомдол, өргөдөл их ирдэг талаар АТГ-ын Мөрдөн шалгах хэлтсийн дарга Э.Идэрцог хэллээ. Мөн “Хууль эрхзүйн хүрээнд шийдвэрлэж байгаа хэргүүд дээр ямар нэгэн нэр бүхий албан тушаалтан нөлөөлсөн, авлига хээл хахууль авсан гэсэн гомдол их ирдэг. Цагдаагийн байгууллагатай хамтран шалгаж байгаа сүүлийн өдрүүдийн хэргүүдийн нэг нь энэ төрлийнх байгаа. Тиймээс энэ асуудал дээр шинжилгээ, шалгалт хийсэн албан тушаалтнаас гадна шийдвэр гаргасан төвшинд бас шалгах шаардлага гарах нь тодорхой” гэв. Өөрөөр хэлбэл, цагдаагийн дарга нар, шүүхийн шинжээчдээр эхэлсэн энэ төрлийн хэрэг прокурор, шүүхийн байгууллагуудын албан тушаалтнуудаар үргэлжилж мэдэхээр байна. Эх сурвалж: www.polit.mn