Д.ЭНХЭЭ Тува, Хакасын бүгд найрамдах улс, Кемерово мужийн эрх баригчид Новосибирск хүрэх шууд замын барилга байгууламжийн тухай хэлэлцээрт есдүгээр сарын сүүлчээр гарын үсэг зурна. Энэ тухай Тувагийн Эдийн засгийн яамны хэвлэлийн албаны эх сурвалжаас иш татан өнгөрсөн лхагва гарагт ТАСС агентлаг мэдээлжээ. Тувагийн нийслэлд есдүгээр сарын сүүлчээр ОХУ-ын субъектүүдийн “Сибирийн хэлэлцээр” нэртэй эдийн засгийн харилцан хамтын ажиллагааны бүс нутаг хоорондын ассоциацын (МАСС) хуралдаан болно. Сибирийн бүс нутгийн тээврийн хүртээмжийн хөгжил, эдийн засгийн хамтарсан төслийн асуудал тус хуралдааны үндсэн сэдэв байх ажээ. “Хакасын бүгд найрамдах улс болон Кемерово мужийн удирдлага дор Красноярскийн хязгаарыг дамнасан том тойрууг алгасаж Новосибирск хүрэх замын барилга байгууламжийн тухай хэлэлцээрт гарын үсэг зурахаар төлөвлөж байна” хэмээн Тувагийн Эдийн засгийн яамны мэдээлэлд дурджээ. Одоо Тувагийн тээврийн үндсэн зам Красноярскийн хязгаарыг дамнаж байгаа бөгөөд Новосибирск хүрэх шууд зам тус бүгд найрамдах улсаас автомашинаар Сибирийн холбооны тойргийн төв хүрэх хугацааг ихээхэн товчлох ажээ. Мөн түүнчлэн Тувагаас Уулын Алтай хүрэх, Красноярскийн хягаараас Монголыг дамнуулан Хятад руу гарах хил дамнасан авто замын барилга байгууламжийн сэдвийг хөндөж хэлэлцэх юм байна. “Экспортын дэд бүтэц, тээвэр-логистикийн тогтолцооны хөгжил бол Сибирийн эдийн засгийн өсөлтийг хангах гол хүчин зүйл юм. Бид Сибирийн хэлэлцээр” нэртэй эдийн засгийн харилцан хамтын ажиллагааны бүс нутаг хоорондын ассоциацын хуралдаанд ихээхэн найдлага тавьж байна. Манай төслүүдийг дэмжих явдал Тувагийн худалдаа, экспортын харилцааны хөгжилд оруулах бас нэгэн алхам болно” гэж Тувагийн Эдийн засгийн сайд Елена Каратаева хэлсэн байна. Эх сурвалж: “Зууны мэдээ” сонин