Т.САЙХАН Өнгөрсөн бямба гаригт нийслэлчүүд “Автомашингүй өдөр”-ийг тэмдэглэн өнгөрүүллээ. Манай улс хүрээлэн буй орчин, нийгэмд автомашины хэрэглээнээс үүдэн учирч буй сөрөг нөлөөг багасгах  зорилгоор энэ өдрийг 10 дахь жилдээ “Автомашинаас татгалзаж, унадаг дугуй, алхалтыг дэмжье” уриан дор зохион байгууллаа. Баруун-4 замаас Зүүн-4 зам, Их тойруугийн гудамж,  Зүүн-4 замаас Сансарын тунель хүртэл зорчих хэсэг,  Бээжингийн гудамж, Залуучуудын гудамж, Сөүлийн гудамж, Самбуугийн гудамж буюу Байгалийн түүхийн музейн уулзвараас Гэсэр сүмийн уулзвар хүртэлх замыг түр хугацаагаар хязгаарлаж, томоохон зах, худалдааны төв амарч, иргэд олон нийтэд зориулсан урлаг, спортын өдөрлөгийг зохион байгууллаа.  Мөн Төв талбайд унадаг дугуйчдын парад, триатлоны спортын төрөлд орох дуатлоны улсын аварга шалгаруулах тэмцээн өртөөт марафон болж, эрүүл эко хоолны үзэсгэлэн дэлгэгдсэн байлаа.  Үүнээс хамгийн олон өрсөлдөгч, үзэгчтэй нь Дуатлоны тэмцээн байв.  Гүйлт-Дугуй хосолсон дуатлоны спорт манайд 2004 оноос эрчимтэй хөгжиж ирсэн боловч улсын аварга шалгаруулах тэмцээн явагдаж байгаагүй билээ. Тэгвэл НАМЗХ санаачилж, Монголын Триатлоны холбоо, “Ironman Mongolia” клуб хамтран Дуатлоны улсын аварга шалгаруулах анхдугаар тэмцээнийг зохион байгууллаа.  Тэмцээн “Эв нэгдэл” уриан дор болов.  Мэргэжлийн ангиллын тамирчид эрэгтэй, эмэгтэй, I ангиллын сонирхогчид, багийн буухиа гэсэн дөрвөн төрлөөр 10 км гүйлт, 20 км дугуйтай уралдаж хурд хүчээ сорьсон бол сонирхогчид таван  км гүйж,  арван км дугуйтай уралдаж өрсөлдөв.  Сонирхогчийн төрөлд Монгол Улсын  гурав дахь Ерөнхийлөгч,  МАХН-ын дарга Н.Энхбаяр амжилттай оролцож, багийн буухиа төрөлд хүрэл медаль хүртлээ. Тэрээр “Хүний эрүүл мэндэд тустай энэхүү спортыг бүх нийтээр сонирхон хичээллэх хэрэгтэй байна.  Манай намаас хоёр баг оролцсон, бид хүүхэд залуучуудад бие бялдрын хөгжилтэй, өв тэгш хүмүүс болоход уриалах зорилготой оролцсон” гэж байна.  Цаашид Дуатлоны Улсын аварга шалгаруулах тэмцээнийг  жил бүрийн “Автомашингүй өдөр”-өөр зохион байгуулахаар болж байгаа юм байна. Эх сурвалж: “Зууны  мэдээ” сонин