Л.ХЭРЛЭН БНСУ-ын нийслэл Сөүл хотод  дэлхийн 52 орны батлан хамгаалахын удирдах түвшний төлөөлөгч,  олон улсын гурван байгууллага оролцсон “Сөүлийн Батлан хамгаалахын яриа хэлцэл 2018” уулзалт боллоо. Долоо дахь удаагаа зохион байгуулагдаж буй олон талт аюулгүй байдлын яриа хэлцэлд Монгол Улсын Батлан хамгаалахын дэд сайд Т.Дуламдорж тэргүүтэй төлөөлөгчид оролцсон юм. Уулзалтаар “Тогтвортой энх тайван: Мөргөлдөөнөөс хамтын ажиллагаа” гэсэн ерөнхий сэдвийн хүрээнд Солонгосын хойгийг цөмийн зэвсгээс ангижруулах, Зүүн Хойд Азийн стратегийн түншлэл, хүчирхийлэл, заналхийлэлтэй тэмцэхэд чиглэгдсэн батлан хамгаалах хамтын ажиллагаа, далайн аюулгүй байдал гэсэн үндсэн дөрвөн хэлэлцүүлгийг хийжээ.  Мөн энхийг сахиулах болон терроризмтэй тэмцэх ажиллагаа, эрчим хүчний аюулгүй байдлын хамтын ажиллагаа, кибер аюулгүй байдлын талаар салбар хэлэлцүүлгүүд болжээ. БНСУ-ын Батлан хамгаалахын сайд Сун Ён Мү нээлтийн ёслолд хэлэхдээ “Сөүлийн батлан хамгаалахын яриа хэлцэл нь Солонгосын Хойг, Зүүн Хойд Азид төдийгүй дэлхий нийтийн энх тайван тогтвортой байдалд өөрийн хувь нэмрийг оруулах бүс нутгийн томоохон арга хэмжээ болж өргөжиж байгаа”-г онцолсон байна. Энэ удаагийн яриа хэлцэл нь оролцогчийн тоогоор төдийгүй хэлэлцэж буй асуудлын агуулгаар өмнөх хэлцэлүүдээс өргөжиж зөвхөн Солонгосын Хойг, Зүүн Хойд Азийн аюулгүй байдлыг хэлэлцээд зогсохгүй дэлхий нийтийн хувьсан өөрчлөгдөж буй аюулгүй байдал, энх тайван тогтвортой байдлын тухай хэлэлцэж, санал солилцсоноороо онцог юм. Энэ үеэр “Төв Ази болон БНСУ, Монгол Улсын Батлан хамгаалахын дэд сайд нарын уулзалт”, “ACEAH-ны орнууды болон БНСУ-ын Батлан хамгаалахын дэд сайд нарын”, “Кибер аюулгүй байдлын ажлын хэсгийн уулзалт” зэрэг олон талт уулзалтууд болжээ. Эх сурвалж: www.polit.mn