Х.ОЮУНБОЛД Хоёр Солонгосын төрийн тэргүүнүүд энэ долоо хоногт уулзахаар болсон. Тэдний гол хэлэлцэх асуудал бол   Солонгосын арлыг цөмийн зэвсэггүй болгох юм байна.  Мөн  төрийн тэргүүнүүдийн хийх уулзалтад бэлтгэхээр Өмнөд Солонгосын 93 хүний бүрэлдэхүүнтэй төлөөлөгч Пхеньянд очсоныг “Ёнхап” агентлаг уламжилсан юм.  Харин  ерөнхийлөгч Мүн Жэ Ин болон удирдагч Ким Жон Ун нар уулзалтын үеэр хэлэлцэх гол асуудал нь цөмийн зэвсэггүй болгох асуудал байх болно гэж   Хөх ордноос мэдээлэв. Харин энэ ордны хэвлэлийн төлөөлөгч Им Жон Сеок  “Саяхныг хүртэл  цөмийн зэвсэггүй болгох асуудал нь АНУ болон Хойд Солонгосын хооронд маргаан дэгдэх шалтгаан болж байсан. Одоо хоёр орон хоорондоо хэлэлцэх чухал сэдэв болж байна” гэж ярьжээ.   Тэрээр энэ тухай хоёр Солонгосын тэргүүнүүдийн  энэ долоо хоногт хийхээр төлөвлөсөн уулзалтын ажлын хөтөлбөрийг ярих үеэрээ хэлсэн байна. Им Жон Сеок “Энэ нь хэдийгээр мэргэжлийн төвшинд хэлэлцэх асуудал биш  ч иймэрхүү уулзалт ярилцлагаар  зөвшилцөлд хүрч чадахгүй”гэв.  Хойд Солонгосын удирдагч Ким Жон Ун  өнгөрсөн дөрөв­дүгээр сарын 21-нд ­цөмийн болон баллистик пуужингийн цөмийн туршилт хийхийг хойшлуулахыг тушааж байсан билээ.  Түүнчлэн   АНУ, болон Өмнөд Солонгосын харилцаа хэвийн байдалд орж байгаатай холбогдуулан атомын туршилт  хийдэг Пунгри  талбайг хааж байгаагаа мэдэгдсэн юм.  Мөн Дональд Трамп, Ким Жон Ун нар өнгөрсөн зургадугаар сарын 12-нд Сингапурт түүхэн уулзалт хийсэн билээ.  Энэ  уулзалт талууд хамтын шинэ харил­цааг бий болгох  хам­тар­сан мэдэгдэлд гарын үсэг зурснаар өндөр­лөсөн юм.  Хойд Солонгосын удирдагч Ким Жон Ун уулзалтын үеэр  Солонгосын арлыг бүрэн цөмийн зэвсэггүй болгоно гэсэн амлалтаа бататгасан бол  АНУ-ын ерөнхийлөгч Дональд Трамп Пхеньяны аюулгүй байдлыг хангана гэдгээ амласан билээ. Харин одоо уулзахаар төлөвлөөд байгаа хоёр Солонгосын тэргүүнүүд  дөрөв болон тавдугаар сард уулзсан юм. Эх сурвалж: “Зууны мэдээ” сонин