Ч.ГАНТУЛГА Улаанбаатар хот энэ өдрүүдэд Солонгосын соёл, урлагаар давалгаалж байна. Учир нь БНСУ-аас Монгол Улсад суугаа Элчин сайдын яам Монгол дахь Солонгос иргэдийн нийгэмлэгтэй хамтран зохион байгуулж буй “Солонгосын долоо хоног-2018” үйл ажиллагаа Улаанбаатар хотод үргэлжилж байна. Өдөрлөгийн хүрээнд 18, 19-нд “Кино өдөрлөг”-ийг зохион байгуулахаар болжээ. Хэрэв Солонгосын адал явдалт, түүхэн, хайр сэтгэлийн тухай өгүүлэх шинэ киног үзэхийг хүсч байвал Их дэлгүүрт байрлах “Icinema” театрыг зориорой. Эртний түүхтэй Солонгос улс, тэдний онцлог, соёл, урлагийн гайхамшгийг нь мэдэрч, шилдэг азтан болох гайхалтай өдрүүд энэ сарын 25-ныг хүртэл үргэлжлэх юм. “Солонгосын долоо хоног”-ийн нээлтэд Улаанбаатар хотын захирагч С.Батболд оролцлоо. Тэрээр “Монгол Улс БНСУ-тай 1990 онд дипломат харилцаа тогтоож, эртнээс найрсаг харилцаатай, олон улсын төвшинд ч бие, биеэ харилцан дэмжиж ирсэн уламжлалтай. Улаанбаатар, Сөүл хотод анх 1995 онд ах дүүгийн найрсаг харилцаа тогтоосон. Үүнээс хойш  өдгөө 23 жил өнгөрч байна. Энэ хугацаанд харилцаа, хамтын ажиллагааг нийгэм, эдийн засгийн бүхий л салбарт өргөжжээ. Энд хүрэлцэн ирсэн та бүхэн Солонгос улсын үндэсний соёл, урлаг, уламжлал, зан заншлын  талаар бага боловч мэдлэгтэй болж, хоёр улсын иргэдийн харилцан ойлголцол нэмэгдэнэ гэдэгт итгэлтэй байна” гэв. “Солонгосын долоо хоног-2018” арга хэмжээнд Солонгосын үндэсний урлагийн концерт, Солонгос хоолны наадам, Солонгос киноны өдөрлөг, Таэквондогийн тэмцээн, Гоо даамны олон улсын тэмцээн, Солонгос дууны тэмцээн гэсэн олон сонирхолтой хөтөлбөр багтжээ. Эх сурвалж www.polit.mn