С.САРУУЛ Өнгөрсөн амралтын өдөр /2018.09.15/ Дулааны IV цахилгаан станц тэг зогсолт хийж улаанбаатарчууд бүтэн өдөр цахилгаангүй болсон. Энэ талаар Эрчим хүчний сайд Ц.Даваасүрэн өнөөдөр /2018.09.17/ мэдээлэл хийлээ. Тэрээр  “Дулааны IV цахилгааны станцад асуудал гарахад бусад станц дагаад тэг зогсолтод шилжсэн. Энэ осол бидэнд том дохио өглөө. Багануур дээр 350 мгвт-ийн генератортой хоёр станц барих тухай ярьж байгаа. Гэтэл ТЭЦ-4 дээр 380 мгвт-тай явж байгаад унахад бүгд дагаад уначихаж байна. Тиймээс Багануур дээр ийм цахилгаан барих нь эрсдэлтэй байгаа юм. Нар, салхины эрчим хүчний хэрэглээнд зохицуулалт хийх явдал бас их чухал байна. Нар, салхины эрчим хүчний 1500 зөвшөөрөл байдаг. Эдгээрийг цэгцлэх сэрүүлгийг бидэнд өгөөд байна. Бие даасан эрчим хүчний системтэй болохын тулд усан цахилгаан станцын төслүүдээ хурдан хийх хэрэгтэй. Амгаланг 50 мгвт, ТЭЦ-3-ыг 75 мгвт-аар өргөтгөх шаардлагатай. Боломж ч хангалттай бий. Станцын үйлдвэрлэл, аюулгүй байдлыг ерөнхий инженер хариуцдаг. Оны эхээр гарсан осолтой холбогдуулан, ерөнхий инженерт нь хариуцлага тооцох бичгийг ТӨБЗГ-т явуулсан ч хариуцлага тооцоогүй.  Салбарын  яам нь хариуцлага тооцох эрх мэдэлгүй. Тэгээд осол гарахаар над руу шууд хандаж байгаа юм. Гэтэл энэ компаниудыг чинь удирдлагаар хангаж, хариуцлага тооцдог газар нь ТӨБЗГ болчихоод байна. Өнгөрсөн долоо хоногийн Засгийн газрын хуралдаанаар төрийн өмчит эрчим хүчний компаниудыг Эрчим хүчний яаманд шилжүүлэх асуудлыг хэлэлцэх байсан ч хойшлуулсан. Бид хариуцлагаа тооцъё. Гэхдээ компаниудаа өөрсдийнхөө мэдэлд авъя гэж байгаа юм” гэсэн юм. Мөн тэрээр сэтгүүлчдийн асуултад хариулахдаа  “ТЭЦ-IV-т хоёр газар гэмтэл гарсан. Үүнийг нягтлах хэрэгтэй байна. Ослоос үүдэх хохирлыг тодорхойлоход бэрх. Техникийн хувьд хоцрогдсон зүйл бий. Тиймээс ОХУ-аас зээл аваад дөрвөн генераторийн засварыг эхлүүлж байтал яг ийм асуудал боллоо. Өвлийн ачааллыг давах, дөрвөн генераторийг шинэчлэхийн тулд түр зогсоохоос өөр аргагүй. Өвлийн ачаалал дууссаны дараа шинэчилнэ” гэлээ. Эх сурвалж: www.polit.mn