Б.ЗАЯА

Агаарын бохирдлыг бууруулахаар 2011 онд Засгийн газраас том оврын автобусыг шингэрүүлсэн нефтийн хий болон дизель түлшний хосолмол хэрэглээнд шилжүүлэх төслийг 3.5 тэрбум төгрөгөөр санхүүжүүлсэн. 2012 оны нэгдүгээр сарын 1-нээс хэрэгжиж эхлэхээр “Агаарын бохирдлыг бууруулах үндэсний хороо”-ноос гаргаж байсан тогтоол одоо ч биелэлээ олоогүй байна.

Төслийн хүрээнд эхний ээлжинд Автобус-1, 3, “Цахилгаан тээвэр” компанийн 250 автобусанд хийн түлшээр ажиллах төхөөрөмж суулгах байсан. Уг ажилд “Тур телеком” гэх компанийг гүйцэтгэгчээр сонгосон байдаг аж. Ажлын явцад Солонгосоос оруулж ирсэн төхөөрөмжүүд нь “Daewoo” автобусанд зориулагдаагүй учир наад захын боолт бэхэлгээ тохирохгүй, цаашлаад аюулгүй ажиллагааны стандарт байгаагүйгээс уг ажил нэг хэсэгтээ зогссон болохыг эх сурвалжууд хэлж байна. Өөрөөр хэлбэл, төхөөрөмж нь манай орны нөхцөлд ажиллаж болох туршилт хийгээгүй, ажиллуулах журам стандартгүй ирснийг нийтийн тээврийнхэн учирлаж байна. Инженерүүд монголчлох маягаар ажлаа урагшуулж, 250 автобусанд төхөөрөмжөө суурилуулжээ. Уг ажлын хүрээнд автобус компаниуд дэргэдээ хийн түлшний станцууд барих шаардлагатай ч газрын асуудал шийдэгдэхгүй байгаа гэнэ. Одоогоор “Цахилгаан тээвэр” компани станцаа барьжээ. Харин саяхан “Тур телеком” компаниас дараагийн ээлжийн хувийн хэвшлийн долоон компанийн 150 автобусанд суурилуулах төлөвлөгөөг шаардсан гэнэ. Гэвч өмнөх ажлын үр дүн гараагүй учир хүлээгдэж буй ажээ.