С.УЯНГА Улсын Их хурлаар өнгөрсөн жилийн өдийд зарим улсад суух Элчин сайд нарыг томилсны дотор Г.Тэнгэрийг Японд, Н.Чимгүүндарийг  Канадад суух элчингээр дэмжиж байв. Гэвч тэдэнтэй хамт Швейцарь, Франц, Герман,  Америкт томилогдсон Л.Пүрэвсүрэн,  А.Баттөр, Д.Ганбат, Ё.Отгонбаяр нар аль хэдийнэ томилолтоо өвөртөлсөн ч Г.Тэнгэр,  Н.Чимгүүндарь нарын итгэмжлэх жуух бичигт Ерөнхийлөгч гарын үсэг зурахгүй жил тойрон хүлээлгэж байгаа юм.  Төрийн тэргүүн тэднийг дэмжихгүй байгаа шалтгаанаа Ерөнхий сайдад хүргүүлсэн албан бичигт тайлбарлахдаа “Монгол Улсаас Япон улсад суух Элчин сайдаар Г.Тэнгэрийг, Канад улсад суух Элчин сайдаар Н.Чимгүүндарийг тохоон томилох тухай асуудлыг УИХ-ын 2017 оны тавдугаар сарын 25-ны өдрийн нэгдсэн хуралдаанаар хэлэлцэн зөвшилцсөн. Гэвч Элчин сайдаар ажиллахаар болсон эдгээр нэр дэвшигч нь тухайн албыг хаших насны шалгуурыг хангаагүй, тэднийг томилохдоо төрийн албаны мерит зарчмыг зөрчсөн болон Монгол Улсын чухал гуравдагч хөрш орнуудад суух Элчин сайдын өндөр хариуцлагатай албыг зохих төвшинд хашиж чадахгүй гэж үзэж байгааг харгалзан тэднийг тохоон томилох тухай зарлиг болон Итгэмжлэх жуух бичгийг гаргах боломжгүй байна” гэсэн байдаг.  Ерөнхийлөгчийн шаардлагыг хангаж дипломат албанд тэнцэхгүй гэгдэж буй Г.Тэнгэр нь 1974 онд Улаанбаатар хотод төрсөн. 1994 онд Токио хотын Гадаад хэлний сургууль, 1998 онд Япон улсын Ёкохамагийн Үндэсний дээд сургууль, 2016 онд МУИС-ийн Нийгмийн ухааны сургуулийг төгссөн. Англи, япон хэлний мэдлэгтэй, төрийн албанд есөн жил, дипломат албанд нэг жил ажилласан  бол Г.Чимгүүндарь 1983 онд төрсөн. 2006 онд Москвагийн Олон улсын харилцааны дээд сургууль, 2016 онд Францын Үндэсний удирдлагын их сургууль төгсч, Нидерландын Клингендалийн их сургуульд олон улсын харилцааны чиглэлээр мэргэжил дээшлүүлсэн. Франц, орос, англи хэлний мэдлэгтэй, “Тэргүүн итгэмжит” дипломат цолтой, дипломат албанд 11 жил ажилласан гэж танилцуулгадаа бичжээ. Тэгвэл хоёр хоногийн өмнө Засгийн газар хуралдаж зарим улсад суух Элчин сайд нарын нэрийг зарласны дотор өнгөрсөн жилийн хавраас өдий хүртэл Ерөнхийлөгчийн томилгоон дээр гацаад буй Г.Тэнгэр, Н.Чимгүүндарь нарыг дахин “зүтгүүллээ”. Ингэхдээ Г.Тэнгэрийг Японд биш Австралийн холбооны улсад, Н.Чимгүүндарийг Канадад биш Тайландын вант улсад суух Элчин сайдаар томилуулах саналаа Ерөнхийлөгчид өргөн мэдүүлэхээр тогтлоо. Өөрөөр хэлбэл, тэдний элчингээр очихоор яригдаж байсан орнуудын нэрийг өөрчилж оруулж иржээ. Эндээс харахад өмнө нь Ерөнхийлөгч “Насны шалгуур хангаагүй, төрийн албаны мерит зарчмыг зөрчин нэр дэвшүүлсэн” гэж дүгнэснээ баталж тэднийг дахин дэмжихгүй юү. Эсвэл Япон, Канад бус Австрали, Тайландад томилох санал гаргасан учраас “Монгол Улсын чухал гуравдагч хөрш орнуудад суух Элчин сайдын өндөр хариуцлагатай албыг зохих төвшинд хашиж чадахгүй” гэсэн байр сууриа өөрчилж дэмжих үү гэдэг нь анхаарал татаж байна. Нөгөө талаас эрх баригч намын боловсон хүчний нөөцөд Элчин сайдын албан тушаалд дэвшүүлчих хүн Г.Тэнгэр, Н.Чимгүүндарь нараас өөр үнэхээр алга уу. Эсвэл өнгөрсөн жилийн жуух бичгийн зүсийг нь өөрчлөөд оруулж ирсэн энэ удаагийн томилгоогоор төрийн тэргүүнийг басамжлаад байна уу. Аль эсвэл далд хэлбэрийн улс төрийн ашиг хонжоо явж байгааг ч таашгүй. Ерөөс Г.Тэнгэр, Н.Чимгүүндарь нарыг  Элчин сайдаар томилохгүй гэсэн тов тодорхой шалтгаан хэлсэн Ерөнхийлөгчийн соёрхлыг дахин гацаах шалтгаан болж магадгүй юм. МАН-ынхан Н.Чимгүүндарь, Г.Тэнгэр нарыг ямар шалтгаанаар дахин дахин Элчин сайдад зүтгүүлээд байна вэ. Эх сурвалж: “Зууны мэдээ” сонин