Т.САЙХАН

Ерөнхийлөгч Х.Баттулгын санаачилсан “Хүнсний аюулгүй байд­лын үндэсний чуулган” өчиг­дөр Төрийн ордонд боллоо.  Чуулганд хүнсний үйлдвэрлэл эрхлэгчид, төрийн болон ТББ, 21 аймгаас хүрэлцэн ирсэн фер­мерүүд, малчин, тариа­лан эрхлэгчид, эмч, эрдэмт­дийн төлөөлөл оролцсон юм. 

Х.Баттулга: ТӨР НЬ ҮНДЭСНИЙ ҮЙЛДВЭРЛЭЛЭЭ ХАМГААЛАХГҮЙ БОЛ ЗАХ ЗЭЭЛ ТЭДНИЙГ ӨМГӨӨЛӨХГҮЙ

Ерөнхийлөгч Х.Баттулга чуулганыг нээж хэл­сэн үгэндээ “...2010 онд  шинэчлэгдсэн Монгол Улсын үндэсний аюулгүй байдлын үзэл баримтлалд Аюулгүй байдлын чухал хэсэг бол хүнсний аюулгүй байдлын асуудал хэмээн тусгасан. Хүнсний аюулгүй байдал нь олон жил яригдсан ч ямар ч шийдэлд хүрээгүй, иргэд сонсохоосоо ч залхах болсон улигт асуудал болох дөхжээ. Одоо элдэв тодорхойлолт, уриа, тун­хагаа орхиод бодит ажил, шийдэлд хүрмээр байна. Импортын хүнс аюулгүй байдал, эрүүл ахуйн шаард­лагыг хангахгүй бай­на. Үүнээс болоод ийм тийм өвчлөл, үхэл хага­цал их байна гэж ярьсаар, бичсээр байгаад дөжирчээ. Сүүл­дээ Хүнсний аюулгүй байдал гэдэг нь дарга нарын аманд эргэлддэг хэлц үг маягтай л ойлгог­до­ход хүрч байна...” гэлээ. Мөн “Төр нь Үндэсний үйлдвэрлэлээ хамгаалахгүй л юм бол зах зээл тэднийг өмгөөлөхгүй. Тийм боло­хоор дорвитой, алсын хараатай асуудлыг энэ чуулганаараа хэлэлцэж, та бүхнээс санал сонсож, шийдлийг Засгийн газ­раас гаргахыг шаардах болно...” гэлээ.   Үндэсний чуулганыг угтан өнгөрсөн наймдугаар сараас эхлэн мах, махан бүтээгдэхүүн, төмс, хүнсний ногоо, сүү, сүүн бүтээгдэхүүн сэдвээр  салбар хуралдааныг зохион байгуулсан байна.

“ҮДИЙН СҮҮ” ХӨТӨЛБӨР ХЭРЭГЖҮҮЛЭХ БОЛОМЖТОЙ

Хүнсний аюулгүй байдлын чуулганы үеэр дотоодод үйлдвэрлэсэн болоод гадаадаас оруулж ир­дэг хүнсний аль алийг багтаан хэлэлцлээ. 2017 оны хувьд экспортод 150 мян­­ган тонн мах гаргах боломж­той гэсэн ч оны эх­ний хагас жилд ердөө л 7000 мянган тонн мах экс­портолжээ. Экспорт дор­витой нэмэгдэхгүй бай­гааг малын эрүүл мэнд­тэй холбон ойлгохоос арга­гүйг Махны холбооны мэргэ­жил­тэн тодотгож байлаа. Нийслэл хотынхоо хаяанд шүл­хий гарч, өмнө нь огт гарч байгаагүй мялзан өв­чин бүртгэгдсэн нь олон улсад Монголын нэр хүндийг унагасаар бай­на. Дэлхий нийтээрээ “Фермерийн хотноос хоол­ны ширээ” хүртэл зар­чим үйлчилж, эрүүл ахуйг ихэд чухалчилж байгаа юм.  Ийм үед махны эрүүл ахуйн асуудалд  анхаарлаа хандуулах чухал байгааг илтгэгч Б.Мөнхзаяа он­цолж байсан юм. Сүү үйлд­вэрлэлийн тухайд нэмэг­дүүлэх боломжтой учир сүү импортлохыг хориглох ёстой гэж үздэг хүмүүс цөөнгүй. Гэвч илт­гэгч Г.Энхбилэгийн хувьд импортыг хориглох хязгаарлах гэхээсээ илүү­тэй стандартын шаард­лагыг тодорхой бол­гох нь зөв гэсэн байр суурь илэрхийлж бай­лаа. Түүнч­лэн сүүний бодлогын хороо байгуулах, “Үдийн сүү” хөтөлбөр хэрэгжүүлэх, төрийн худалдан авалтыг нэмэгдүүлэх зэргээр үндэсний үйлдвэрлэлийг дэмжих боломжтой гэдгийг тодотгосон юм.  Ийнхүү мал аж ахуй, хүнс үйлдвэрлэлийн салбарт эдийн засгийн бодитой дэмжлэг хэрэгтэй байгааг олон хүн хэлсэн.  Хүнсний үйлдэрүүд бүрэн хүчин чадлаараа ажиллаж чадахгүй байгаагийн гол гогцоо санхүүжилт, эргэлтийн хөрөнгийн дутмаг байдалтай хол­боо­той гэлээ. Чуулганд яригдсан болон гарсан шийдвэрүүдийг хэлэлцээд Ерөнхийлөгч Засгийн газарт хүргүүлж, дэмжин ажиллахыг шаардах болно гэдгээ хэлж байв.