Б.ЗАЯА

Дэлхийн өвд бүртгэгдсэн Увс нуурын хөвөөнд, Увс аймгийн 19 сумын 14-ийнх нь газар нутгийг хамарсан 19720 км.кв талбайд өнгөрсөн жилээс БНХАУ-ын хөрөнгө оруулалттай “Монголиа гладвилл Увс петролиум” компани газрын тосны хайгуул хийхээр болсон билээ. Засгийн газрын тогтоолоор Бүтээгдэхүүн хуваах гэрээ байгуулах эрхтэй болсон тус компанийн лицензийн талбайд Увс аймгийн нийт газар нутгийн гуравны нэг төдийгүй Дэлхий өвд, Рамсарын конвенцид бүртгэгдсэн Увс нуурын ай сав газар, олон сумын бэлчээр нутаг, онгон дагшин байгалийн үзэсгэлэнт газрууд багтаад байгаа юм. Улсын хэмжээнд бэлчээрийн хомсдолд орсон сумын тоонд ороод буй Тэс сумын нийт газар нутгийн гуравны нэгд гадаад компани хайгуулын ажил хийхээр төлөвлөсөн бол Зүүнговь сумын нутаг дэвсгэрийн 90 хувь нь хайгуулын талбайд оржээ. Зүүнговь суманд гэхэд бэлчээр ашиглахаар 15 жилийн гэрээ байгуулсан 160 гаруй малчин өвөлжөө, хаваржааны газаргүй болох эрсдэл учраад буй. “Монголиа гладвилл Увс петролиум” компани хайгуулын ажлынхаа явцад Монгол Улсын олон хууль, журам зөрчиж нутгийн иргэдийн хүчтэй эсэргүүцэлтэй тулгарсан юм. Увс аймгийн Тэс, Зүүнговь сумын иргэд бэлчээр нутгаа хамгаалж олон удаа жагсаал цуглаан зохион байгуулсны хүчинд тус компани өнгөрсөн сард үйл ажиллагаагаа зогсоон Монгол Улсаас гарсан.

Тэгвэл Увс аймгийн иргэдийн төлөөлөл Увс нуур, газар нутгаа хамгаалах “Дэлхийн өв Увс нуур төв” төрийн бус байгууллага байгуулан тэмцлийн ажлыг үргэлжлүүлж байна. Тус байгууллага “Гладвилл” компанид олгосон газрын тосны лиценз, Бүтээгдэхүүн хуваах гэрээг цуцлуулах хүртэл тэмцэхээ мэдэгдэж буй. Энэ үйл ажиллагаанд Увс аймгийн иргэд төдийгүй газар нутгаа гэсэн сэтгэлтэй нийт Монголын ард түмний дэмжлэг хэрэгтэй хэмээн тэд онцолж байна. Энэ хүрээнд төрийн бус байгууллагын үйл ажиллагааг бэхжүүлэх, шүүх хуулийн байгууллагад хандах  цаашдын үйл ажиллагаанд дэмжлэг үзүүлэх зорилгоор хандив цуглуулж эхэлжээ. Та энэ үйлсэд нэгдвэл “Дэлхийн өв Увс нуур төв” ТББ-ын Голомт банкин дахь 1105120770 дугаарын дансанд хандив өргөх боломжтой ажээ.