Киргизстаны Иссык-Куль мужийн Ананьево тосгонд ховордсон цоохор ирвэсийг судлах, хамгаалах, нөхөн сэргээх зориулалттай “Ак Илбирс” цогцолбор нээгджээ. Нээлтийн ёслолд Киргизстаны Ерөнхий сайд Адылбек Касымалиев, Татарстаны Ерөнхийлөгч Рустам Минниханов нар оролцсон байна.

Киргизстаны Засгийн газрын хэвлэлийн албаны мэдээлснээр, тус төв нь ховордсон амьтдын судалгаа хийх, мал эмнэлгийн тусламж үзүүлэх, тэдгээрийн тоо толгойг нөхөн сэргээхэд чиглэнэ.

Мөн цоохор ирвэсийн генетикийн олон янз байдлыг хадгалах, популяцийг хамгаалах, байгаль хамгааллын чиглэлээр судалгаа, шинжилгээ хийх ажлыг хэрэгжүүлэхээр төлөвлөжээ.

Нээлтийн үеэр Ерөнхий сайд Адылбек Касымалиев уг төсөл нь байгаль орчныг хамгаалах салбарын олон улсын хамтын ажиллагааг бэхжүүлэхэд чухал ач холбогдолтойг онцолсон байна. Тэрээр цогцолборыг байгуулахад дэмжлэг үзүүлж, Киргизстан болон Татарстаны хамтын ажиллагааг хөгжүүлэхэд хувь нэмэр оруулсанд Рустам Миннихановт талархал илэрхийлжээ.

Цоохор ирвэс нь Төв болон Өмнөд Азийн өндөр уулын бүсэд амьдардаг, устах эрсдэлтэй зэрлэг амьтдын нэг юм. Түүний амьдрах орчныг хамгаалах, хууль бус агнууртай тэмцэх, тоо толгойг тогтвортой хадгалах нь бүс нутгийн байгаль хамгааллын чухал зорилтод тооцогддог.

Эх сурвалж: kz24