Фото: Ормузын хоолойн газрын зураг. /Википедиа/

АНУ-ын Ерөнхийлөгч Дональд Трамп Ираны санал болгосон долоо хоногийн  хугацаатай гал зогсоох саналыг няцааснаа өнгөрсөн баасан гаригт мэдэгдэв. Иран Ормузын хоолойг долоо хоногийн дараа нээж, хэлэлцээрээ үргэлжлүүлэхээр санал болгосон бол Трамп "Би тэдний саналыг няцаалаа" гэж сэтгүүлчдэд хэлсэн washingtontimes мэдээлжээ.

Тегеран хоолойгоор зорчих хөдөлгөөнийг нээх хариуд АНУ-ын тэнгисийн бүслэлтийг цуцлах, нефтийн хориг арга хэмжээнд чөлөөлөлт олгох, гал зогсоохыг Ливанд өргөтгөх зэрэг шаардлага тавьсан. Саналыг Катарын зуучлагчаар дамжуулсан байна. Ираны Гадаад хэргийн сайд Аббас Аракчи НҮБ-д хэлэхдээ шаардлага биелбэл долоо хоногийн дотор хоолойг нээж болно, шийдвэр одоо АНУ-ын гарт байгаа гэж онцолжээ.  

The Wall Street Journal сонины мэдээлснээр Трамп арваннэгдүгээр сарын дунд хүртэл болох АНУ-ын завсрын сонгуулийн дараа Ираны эсрэг бөмбөгдөлтийг сэргээхээр төлөвлөж байна. Энэ нь АНУ-ын нэрээ нууцалсан албаны хүмүүсээс авсан мэдээлэл болохыг уг хэвлэл тэмдэглэсэн байна.

АНУ, Израиль улс хамтран Иранд хоёрдугаар сарын 28-нд агаарын цохилт өгсөнөөр энэхүү дайн эхэлсэн билээ. Талууд хэлэлцээний ширээний ард нэг бус удаа сууж байгаа ч дайныг эцэслэн зогсоох шийдэлд өнөөг хүртэл хүрч чадаагүй байна.

Эх сурвалж: polit.mn