З.ЦЭЦЭГ

Оросын Засгийн газар Алтайн бүс нутгаар дамжуулан Хятад улс руу чиглэсэн Транс-Алтайн төмөр зам барих боломжийг хэлэлцэж байна. Энэ тухай "Коммерсант" сонин эх сурвалжаас иш татан мэдээлжээ.

Тус мэдээлэлд дурдсанаар, уг төсөл нь Алтайн Бүгд Найрамдах Улс Хятадын Шинжаан-Уйгурын Өөртөө Засах Оронтой шууд хиллэдэг Казахстан, Монгол Улсын хоорондох 55 км урт хэсгээр дамжуулан Хятад руу чиглэсэн төмөр замын холбоос байгуулахыг тусгажээ. Энэ асуудлаар мэдээлэл бүхий эх сурвалжийн тайлбарласнаар, уг саналыг ОХУ-ын Ерөнхийлөгчийн 7-р сарын 27-ны өдөр гаргасан "Тээврийн дунд коридор" хэмээх шинэ төслийг судлан үзэх тухай чиглэлийн дагуу боловсруулж байгаа аж. Энэхүү санаачилга нь "Транс-Каспийн олон улсын тээврийн маршрут"-тай өрсөлдөх, мөн Европ болон Азийг холбосон өмнөд чиглэлийн далайн тээврийн замуудад өөр хувилбар санал болгох зорилготой юм.

Тус сонинд дурдсан эх сурвалжийн мэдээлснээр, Транс-Алтайн төмөр замын чиглэлийн дөрвөн хувилбарыг судалж байна. Бүх хувилбарын эцсийн цэг нь Хятад улс дахь Авайтан өртөө байх юм.

Харин эхлэх цэгийн хувьд Бийск (хоёр хувилбарыг авч үзэж буй), Баруун Сибирийн төмөр замын Таштагол өртөө эсвэл Красноярскийн төмөр замын Абаза хот зэрэг байршлууд багтаж байна. Санал болгож буй чиглэлүүдийн урт 825-аас 1,123 км-ийн хооронд хэлбэлзэж байгаа бөгөөд үүнд Хятадын нутаг дэвсгэрээр дайран өнгөрөх 228 км урт хэсэг багтжээ.

Мэдээлэлд дурдсанаар, Тээврийн яам нь уг төсөлтэй холбоотой байгаль орчны хязгаарлалтуудыг үнэлэх, мөн төслийн хэрэгжих боломжийн талаар холбогдох байгууллагууд болон Орос-Хятадын тээврийн асуудал эрхэлсэн дэд хорооны хүрээнд хэлэлцэх үүргийг Байгалийн нөөцийн яаманд даалгах санал гаргаж байна. Үүний дараагаар, маршрутын янз бүрийн хувилбарт үндэслэн төслийн урьдчилсан техник-эдийн засгийн үндэслэлийг боловсруулах асуудлыг авч үзэх боломжтой юм.

Эх сурвалж: polit.mn