Б.Нандин

COVID-19 цар тахлын үеийн шийдвэр, үйл ажиллагаатай холбоотой асуудлаар АНУ-ын Сенат доктор Энтони Фаучиг сонсголд дуудлаа. Харин сонсголын үеэр тэрээр бараг бүх асуултад “АНУ-ын Үндсэн хуулийн Тавдугаар нэмэлт өөрчлөлтөд заасан эрхээ эдэлж, асуултад хариулахаас татгалзаж байна” гэсэн нь олон нийтийн анхааралд ороод байна.
АНУ-ын Сенатын Дотоод аюулгүй байдал, Засгийн газрын асуудал эрхэлсэн хорооны дарга, Бүгд найрамдах намын сенатор Рэнд Полын санаачилсан сонсгол COVID-19-ийн гарал үүсэл, БНХАУ-ын Уханийн вирус судлалын хүрээлэнтэй холбоотой судалгааны санхүүжилт болон цар тахлын үеийн төрийн байгууллагуудын үйл ажиллагааг тодруулах зорилготой байв.

Сенатор Рэнд Пол Фаучиг олон жилийн турш Конгресст худал мэдүүлэг өгсөн, АНУ-ын Үндэсний эрүүл мэндийн хүрээлэнгээр (NIH) дамжуулан Уханийн вирус судлалын хүрээлэнд хийгдсэн маргаантай судалгааг санхүүжүүлсэн, мөн COVID-19-ийн гарал үүслийн талаарх мэдээллийг нуун дарагдуулсан байж болзошгүй хэмээн буруутгаж ирсэн. Харин Фаучи эдгээрийг няцааж, өөрийг нь улс төрийн зорилгоор онилж байна гэж мэдэгдсээр байгаа юм. Одоогоор эдгээр асуудлаар түүнийг гэм буруутайд тооцсон шүүхийн шийдвэр гараагүй. Харин Сонсголын үеэр Фаучи өмгөөлөгчийнхөө зөвлөсний дагуу Үндсэн хуулийн Тавдугаар нэмэлт өөрчлөлтөд зааснаар мэдүүлэг өгөхөөс татгалзах эрхээ ашиглаж, 100 гаруй асуултад хариулаагүй байна. Тэрээр өдөр, гараг, зангианы өнгө зэрэг энгийн асуултад хүртэл ижил хариулт өгсөн нь сонсголын үеэр маргаан дагуулсан юм. 

Сонсголын өмнөхөн сенатор Рэнд Пол Фаучигийн цар тахлын үеийн 1100 гаруй хуудас хувийн тэмдэглэлийг нийтэд дэлгэсэн бөгөөд Фаучигийн өмгөөлөгч үүнийг эрүүгийн хэрэг үүсгэх үндэслэл хайх улс төрийн ажиллагаа гэж үзэж байгаагаа илэрхийлсэн байна.
Тиймээс энэхүү сонсголын дараа Сенатын Дотоод аюулгүй байдал, Засгийн газрын асуудал эрхэлсэн хороо Фаучиг Конгрессыг үл хүндэтгэсэн эсэхийг санал хураан шийдвэрлэхээр болжээ. Гэхдээ хороо дэмжсэн ч энэ нь Фаучиг шууд гэм буруутайд тооцно гэсэн үг биш бөгөөд асуудлыг АНУ-ын Хууль зүйн яам цааш үргэлжлүүлэх эсэхийг шийдвэрлэх юм.
COVID-19-ийн гарал үүслийн асуудал өнөөдрийг хүртэл эцэслэн шийдэгдээгүй хэвээр байна. АНУ-ын зарим тагнуулын байгууллага вирус лабораториос алдагдсан байх магадлалтай гэж үздэг бол бусад нь амьтнаас хүнд халдсан гэх хувилбарыг илүү магадлалтай гэж үнэлсээр байгаа юм.

Эх сурвалж: "Зууны мэдээ" сонин

2026 ОНЫ ДОЛООДУГААР САРЫН 31. БААСАН ГАРАГ. № 141 (7883)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn