Б.НАНДИН
Францын Эвиан-ле-Бен хотод "Их долоо" (G7)-ийн дээд хэмжээний уулзалт болж өндөрлөлөө. АНУ, Их Британи, Герман, Франц, Итали, Канад, Япон улсын удирдагчид дэлхийн аюулгүй байдал, эдийн засаг, эрчим хүчний асуудлыг голлон хэлэлцэж Орос-Украины дайны нөхцөл байдал, дэлхийн нийлүүлэлтийн сүлжээ, хиймэл оюуны зохицуулалт зэрэг асуудлаар хамтарсан мэдэгдэл гаргаж нэгдсэн байр сууриа илэрхийлжээ.
Тухайлбал, хамтарсан мэдэгдэлд Украины тусгаар тогтнол, газар нутгийн бүрэн бүтэн байдлыг үргэлжлүүлэн дэмжихээ дахин нотолж, ОХУ-д үзүүлэх эдийн засаг, санхүүгийн дарамтыг сулруулахгүй гэдгээ онцолсныг “Ройтерс” онцлон мэдээлжээ.
Энэ удаагийн уулзалтын гол сэдвийн нэг нь стратегийн ашигт малтмалын нийлүүлэлтийн аюулгүй байдал байлаа. Цахилгаан автомашины батарей, сэргээгдэх эрчим хүч, хагас дамжуулагч, батлан хамгаалах үйлдвэрлэлд шаардлагатай газрын ховор элемент, литий, кобальт зэрэг түүхий эдийн олборлолт, боловсруулалтад Хятад давамгайлж байгаа нь G7-ийн орнуудын хувьд эрсдэл болж буйг удирдагчид онцолсон байна.
Иймээс чухал ашигт малтмалын нийлүүлэлтийн шинэ сүлжээ байгуулах, Африк, Австрали, Латин Америк дахь шинэ уурхай, боловсруулах үйлдвэрүүдэд хамтарсан хөрөнгө оруулалт хийх, стратегийн нөөц бүрдүүлэх асуудлыг эрчимжүүлэхээр тохиролцжээ. Мөн эрдэс баялгийн худалдаанд ил тод байдал, байгаль орчны стандартыг мөрдүүлэхийг чухалчилсан байна.
Хиймэл оюуны хурдацтай хөгжлийн талаар ч удирдагчид тусгай хэлэлцүүлэг өрнүүлж, хүний эрх, үндэсний аюулгүй байдал, худал мэдээллийн эрсдэлийг бууруулах олон улсын хамтын ажиллагааг өргөжүүлэх шаардлагатай гэж үзжээ. Технологийн салбарын томоохон компаниудын төлөөлөл уулзалтад оролцож, хиймэл оюуны аюулгүй хөгжлийн талаарх саналуудаа танилцуулсан байна.
Мөн дэлхийн эдийн засгийн өсөлт саарч буй энэ үед худалдааны саадыг бууруулах, нийлүүлэлтийн сүлжээний тогтвортой байдлыг хангах, эрчим хүчний шилжилтийг түргэтгэх асуудлыг хэлэлцсэн бөгөөд хөгжиж буй орнуудад чиглэсэн дэд бүтэц, цэвэр эрчим хүчний хөрөнгө оруулалтыг үргэлжлүүлэхээ илэрхийлжээ.
Шинжээчдийн үзэж буйгаар энэ удаагийн G7-ийн уулзалт нь зөвхөн Украин дахь дайны асуудалд төвлөрсөнгүй. Харин дэлхийн эдийн засгийн өрсөлдөөн, чухал ашигт малтмалын хангамж, технологийн аюулгүй байдал зэрэг урт хугацааны геополитикийн асуудал G7-ийн шинэ тэргүүлэх зорилт болж эхэлснийг харуулсан уулзалт болсон гэж дүгнэж байна.
Эх сурвалж: “Зууны мэдээ” сонин
2026 ОНЫ ЗУРГААДУГААР САРЫН 18. ПҮРЭВ ГАРАГ. № 115 (7857)
Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.
Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn
