Б.НАНДИН

Дэлхийн эрүүл мэндийн байгууллага (ДЭМБ) Бүгд Найрамдах Ардчилсан Конго Улс болон Угандад дэгдээд буй Эболагийн халдварыг “Олон улсын анхаарал татсан нийгмийн эрүүл мэндийн онцгой байдал” хэмээн зарлалаа.

Энэ удаагийн халдвар нь Эболагийн ховор төрлийн “Bundibugyo” омгоос үүдэлтэй бөгөөд одоогоор энэ төрлийн вирусын эсрэг вакцин, эмчилгээ байхгүй байгаа нь нөхцөл байдлыг улам хүндрүүлж байна.

ДЭМБ-ын мэдээлснээр Конгогийн Итури мужид найман лабораториор батлагдсан тохиолдол бүртгэгдсэнээс сэжигтэй халдвар 246, сэжигтэй нас баралт 80 гаруй бүртгэгдээд байна. Мөн Угандад Конгоос ирсэн иргэдээс хоёр батлагдсан тохиолдол илэрчээ.

Түүнчлэн Конгогийн зүүн хэсгийн Гома хотод халдвар батлагдсан нь бүс нутгийн хэмжээнд вирус тархах эрсдэлийг нэмэгдүүлж буй талаар албаныхан анхааруулсан байна.

АНУ-ын Өвчний хяналт, урьдчилан сэргийлэх төвөөс яаралтай арга хэмжээ авах төвийг бэлэн байдалд ажиллуулж Конго болон Уганда руу мэргэжилтнүүдээ илгээж эхэлжээ. Мөн  агентлагийн мэдээлснээр халдварт өртсөн байж болзошгүй америк иргэдийг бүс нутгаас гаргах ажиллагаа эхэлснийг “Ройтерс” агентлаг мэдээлжээ. ДЭМБ энэхүү вирусын дэгдэлтийг цар тахлын түвшний онцгой байдал гээгүй ч улс орнуудыг хилийн тандалт, хяналтаа чангатгахыг зөвлөсөн байна.

Эх сурвалж: “Зууны мэдээ” сонин

2026 ОНЫ ТАВДУГААР САРЫН 19. МЯГМАР ГАРАГ. № 95 (7837)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn