Б.НАНДИН

АНУ-ын Ерөнхийлөгч Donald Trump-ын бодлогыг эсэргүүцсэн жагсаал бямба гарагт эхэллээ. АНУ даяар буюу 50 муж улсад “No Kings” нэртэй хөдөлгөөн гурав дахь удаагаа зохион байгуулагдаж байгаа нь энэ юм. “Авга ах хуурагч”, “Савраа тат”, “Ардчиллыг аваръя”, “Бидэнд хаан хэрэггүй” зэрэг уриа лоозон эсэргүүцлийн хуудас барьсан олон мянган хүмүүс Трампын цагаачлалын хатуу бодлого, Ираны дайнд оролцож буй шийдвэр зэргийг эсэргүүцэж буйгаа илэрхийлэн гудамжинд жагсжээ. Мөн жагсагчдын цөөнгүй нь өнгөрсөн нэгдүгээр сард Миннесота мужид Цагаачлалын албаны хүмүүст буудуулан амиа алдсан гэмгүй иргэдийг дурсан зургийг нь барин эсэргүүцлээ илэрхийлсэн бол зарим нь Эрх чөлөөний хөшөөний дүрд хувирсан нь ч байв.

“No Kings” хөдөлгөөнийг “Indivisible” зэрэг байгууллагууд зохион байгуулж байгаа бөгөөд тэд АНУ-ын бүх 50 мужид нийт 3,200 гаруй арга хэмжээ төлөвлөжээ. АНУ-ын Нью-Йорк, Даллас, Филадельфи, Вашингтон зэрэг томоохон хотуудад олон мянган хүн цугларсан ч энэхүү үндэсний хэмжээнд өрнөж байгаа жагсаалын гуравны хоёр нь жижиг хотуудад болсон нь хөдөлгөөн хэр өргөжсөнийг харуулж байна. Мөн улс төрчид, олон нийтийн идэвхтнүүд, нийгмийн зүтгэлтнүүд ч олноор дэмжиж байр сууриа илэрхийлжээ. Тухайлбал, Нью-Йорк хотын Ерөнхий прокурор Летиция Жеймс, жүжигчин Роберт Де Ниро болон шашны зүтгэлтэн Аль Шарптон нар Нью-Йорк хотод болсон жагсаалд оролцон алхжээ. Мөн Миннесота мужийн захирагч, 2024 оны сонгуулиар Ардчилсан намаас дэд ерөнхийлөгчид нэр дэвшиж байсан Тим Уолз цугласан олонд хандан “Тэд биднийг радикал гэж нэрлэдэг. Тийм ээ, бид радикал болсон. Энэрэнгүй байхын тулд радикал болсон, ёс зүйтэй байхыг шаардаж радикал болсон, хууль ёсны процессийг хамгаалахын төлөө радикал болсон, ардчиллаас болж радикал болсон, авторитар дэглэмийг эсэргүүцэж радикал болсон” гэж онцолсон байна. Мөн Вермонт мужаас сонгогдсон Сенатын гишүүн Берни Сандерс “Бид энэ улсыг авторитар дэглэм эсвэл олигархи руу уруудахыг зөвшөөрөхгүй. Ард түмэн бид өөрсдөө засаглана” гэж мэдэгджээ. Харин Бүгд Найрамдах намын Конгрессийн хорооноос Ардчилсан намын улс төрчид болон нэр дэвшигчид эдгээр жагсаалыг дэмжиж байгааг шүүмжилсэн байна.

Жагсаалын үеэр зарим хотод мөргөлдөөн гарч, цөөнгүй хүн гэмтэж бэртэж олон хүнийг баривчилжээ. Өнгөрсөн жилийн зургаа болон аравдугаар сард болсон өмнөх хоёр удаагийн үндэсний хэмжээний жагсаалуудад 4-6 сая хүн оролцож байв.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 30. ДАВАА ГАРАГ. № 59 (7801)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn