Б.НАНДИН

Өмнөд Солонгосын ерөнхийлөгч асан Юн Сог Ёл онц дэглэм тогтоож, төрийн эрхийг хууль бусаар авах хэрэгт шалгуулж эхэлснээс хойш нэг жил гаруйн хугацаа өнгөрөөд байна. Тэгвэл түүнийг буруутай эсэхийг шийдэх шүүхийн сонсгол өчигдөр Сөүл хотын төв шүүхэд болж экс ерөнхийлөгч өмгөөлөгчийн хамт оролцжээ. Түүнд тусгай прокурорын зүгээс улс орны өндөр дээд албан тушаалтны хувьд эрх мэдлээ урвуулан ашигласан хэргээр цаазаар авах ял оноох ял төлөвлөжээ. 

Тусгай прокурор Чо Юн Сиок "Бослого бол Үндсэн хуулиар тогтоосон улс орны дэг журмыг эрсдэлд оруулсан маш том гэмт хэрэг" гэж тусгай прокурор шүүгч Жи Куй даргалсан ялын сонсголын үеэр мэдэгдэв. Шүүхийн шийдвэр ирэх сарын 19-нд гарна. Мөн ерөнхийлөгч асан Юнтэй хамт цэрэг, цагдаагийн долоон өндөр албан тушаалтанд ял оноохоор болсон байна. Тухайлбал, Батлан ​​​​хамгаалахын сайд асан Ким Ён Хёнд бүх насаар нь хорих ял, Тагнуулын газрын дарга асан Но Сан Вонд 30 жилийн хорих ял,Үндэсний цагдаагийн газрын дарга асан Чо Жи-Ход 20 жилийн хорих ял төлөвлөжээ.

Эрх баригч Ардчилсан намын зүгээс Юнд хуулиар зөвшөөрөгдсөн хамгийн хүнд шийтгэл оноох ёстой гэж мэдэгдэж, түүнийг "Үндсэн хууль, ардчиллыг уландаа гишгэж, ард түмний амь насанд заналхийлсэн бослогын удирдагч" хэмээн нэрлэсэн байна. 

Шүүхээс түүнийг буруутай гэж үзвэл Юн Сог Ёл тус улсын түүхэнд бослого удирдсан хэргээр цаазын ял сонссон хоёр дахь ерөнхийлөгч болно. Өмнө нь ерөнхийлөгч асан Чон Ду Хванд мөн цаазаар авах ял шийтгүүлж байсан ба 1996 онд бүх насаар нь хорих ял болгон бууруулж, түүний дараа жил нь ерөнхийлөгч Ким Дэ Жүн өршөөлөөр суллажээ.