Б.НЯМСҮРЭН

G7 болон хэд хэдэн орнуудын Сангийн сайд нар даваа гарагт Вашингтонд уулзаж, Хятадаас хамаарах ховор металлын хараат байдлыг бууруулах арга замуудын талаар хэлэлцжээ. Ингэхдээ үнийн доод хязгаарыг тогтоох, өөр эх үүсвэртэй болох, шинэ түншлэл бий болгох зэргээр ярилцсан гэж “Ройтерс” агентлаг мэдээлэв.

АНУ-ын Сангийн сайд Скотт Бессентийн зохион байгуулсан уг уулзалтад G7-ийн гишүүн Япон, Их Британи, Франц, Герман, Итали, Канад, АНУ-ын Сангийн сайд нараас гадна Австрали, Мексик, Өмнөд Солонгос, Энэтхэгийн албаныхан хүрэлцэн иржээ. Мөн уулзалтад АНУ-ын Худалдааны төлөөлөгч Жеймсон Грир болон АНУ-ын Экспорт-Импортын банк, JP Morgan-ы төлөөлөгчид мөн оролцжээ.

Сангийн яамны мэдэгдэлд Бессент чухал ашигт малтмал, ялангуяа газрын ховор элементийн хангамжийн сүлжээг аюулгүй болгох, төрөлжүүлэх шийдлүүдийг хэлэлцэхийг эрмэлзэж байгаа бөгөөд улс орнууд үүнийг дэмжинэ гэдэгт итгэлтэй байгаагаа илэрхийлжээ.

Уулзалтын үеэр Японы Сангийн сайд Сацүки Катаяма Хятадын экспортын хяналтын талаар баримталж буй Японы байр суурь, мөн 2010 онд Хятадын талаас газрын ховор элементийн экспортод тавьсан хоригийг даван туулах явцад олж авсан туршлага зэргийг хуваалцжээ. Хятад Японы харилцаа өнгөрсөн арваннэгдүгээр сараас эрс шийдэмгий мэдэгдлүүдээр үргэлжлэх болсон. Үүнтэй холбоотойгоор БНХАУ-ын зүгээс Япон руу экспортлох газрын ховор элементүүд зэрэг цэргийн болон иргэний зориулалтаар ашиглаж болох давхар зориулалттай бараа бүтээгдэхүүний хяналтаа чангатгаж байгаагаа мэдэгдсэн. Тиймээс ч Катаяма “G7 болон бусад адил үзэл санаатай орнуудын зүгээс Хятадаас өөр ховор металлын хангамжийг нэмэгдүүлэх богино, дунд, урт хугацааны бодлогыг тодорхойлох нь зүйтэй” хэмээн уриалсан байна.

Энэхүү уулзалтад оролцсон орнуудын зүгээс асуудалд илүү хурдан бөгөөд идэвхтэй байх хэрэгтэй гэдэгтсанал нэгджээ. Олон улсын эрчим хүчний агентлагийн мэдээлснээр G7 болон Европын холбоо нь дэлхийн ховор ашигт малтмалын эрэлтийн 60 хувийг эзэлдэг. Гэвч Хятад улс нийлүүлэлтийн сүлжээнд ноёрхож, зэс, лити, кобальт, бал чулуу, ховор металлын 47-87 хувийг олборлодог. Тиймээс Европын холбооны хувьд илүү шийдэмгий бөгөөд, идэвхтэй шийдэл бий болгох нь нэн тэргүүний санаачилга байхыг Германы Сангийн сайд Ларс Клингбейл онцолжээ. Тэрээр улс орнууд БНХАУ-ын эсрэг нэгдэж байгаа нь эрсдэлтэй гэдгийг анхааруулахын зэрэгцээ Франц улс G7-г даргалж байгаа энэ цаг үед ховор элементийн асуудал гол сэдэв байх болно гэжээ. 

Өмнөд Солонгосын Сангийн сайд Ку Юн-Чол уулзалтын үеэр дэлхийн баялгийн сүлжээг бэхжүүлэх ёстой гэв. Мөн нийлүүлэлийн нэгдсэн сүлжээг бий болгохын тулд чухал ашигт малтмалыг дахин боловсруулахын ач холбогдлыг онцолсон байна. Мөн тэрээр бусад улс орнуудыг корпорацийн төслүүдэд чиглэсэн хамтын ажиллагааг үргэлжлүүлэхийг уриалжээ. Харин Канад, Австрали улсууд Өмнөд Солонгосоос технологийн хамтын ажиллагаа хүсчээ.

Эх сурвалж: “Зууны мэдээ” сонин

2026 ОНЫ НЭГДҮГЭЭР САРЫН 14. ЛХАГВА ГАРАГ. № 8 (7750)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn