Т.САЙХАН

Ерөнхий сайд Г.Занданшатар ОХУ-ын Москва хотод болж буй ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд оролцлоо. ШХАБ нь 2001 онд Хятад, Орос, Казахстан, Киргиз, Тажикстан, Узбекистан зэрэг улсын оролцоотойгоор байгуулагдсан. Гишүүн,  ажиглагч, яриа хэлэлцээний түнш 27 улсыг хамардаг. Ажиглагч хоёр улсын нэг нь Монгол Улс юм.

Ерөнхий сайд Г.Занданшатарыг Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин, ОХУ-ын Гадаад хэргийн орлогч сайд М.Ю.Галузин, ГХЯ-ны Төрийн ёслолын газрын захирал И.В.Богдашев нарын албаны хүмүүс угтлаа.

Ерөнхий сайд Г.Занданшатар айлчлалын хүрээнд өчигдөр ОХУ-ын Засгийн газрын дарга Михаил Владимирович Мишустинтэй уулзлаа.  Засгийн газрын тэргүүн нар Монгол Улс, ОХУ-ын Иж бүрэн стратегийн түншлэл, эрчим хүч, аж үйлдвэр, зам, тээвэр, боловсрол, хүмүүнлэгийн хамтын ажиллагаа идэвхтэй гүнзгийрэн бэхжиж буйг онцлон тэмдэглэв.  Ерөнхий сайд Г.Занданшатар Монгол Улсын газар нутгаар дамжуулан ОХУ-аас БНХАУ-д байгалийн хий нийлүүлэх хоолой барих төсөл, “Монгол-Орос-Хятадын Эдийн засгийн коридор байгуулах хөтөлбөр” зэрэг томоохон төсөл, хөтөлбөрийг амжилттай хэрэгжүүлэхэд Монгол Улсын Засгийн газрын зүгээс онцгойлон анхаарч, ажиллаж буйгаа илэрхийлэв.
Монгол Улс нь ОХУ-ын Ази, Номхон далайн бүс нутаг дахь чухал стратегийн түнш бөгөөд хоёр орны иргэд хоорондын урт хугацааны уламжлалт нөхөрлөл, харилцан итгэлцэл, дэмжлэг дээр суурилдаг болохыг ОХУ-ын Засгийн газрын тэргүүн онцоллоо.

ОХУ шатахуун, автобензиний экспортдоо тодорхой хязгаарлалт хийж буй ч энэ нь Монгол Улсад хамаарахгүй, нийлүүлэлт тогтвортой үргэлжилж, газрын тосны бүтээгдэхүүний нийлүүлэлтийн хэмжээг нэмэгдүүлнэ гэж ОХУ-ын Засгийн газрын дарга М.В.Мишустин хэллээ.  Талууд худалдаа, эдийн засаг, шинжлэх ухаан, техникийн хамтын ажиллагааны Монгол, Оросын Засгийн газар хоорондын комиссын ээлжит хуралдааныг энэ онд багтаан Улаанбаатар хотод зохион байгуулахаар тохиролцлоо.

Мөн хуралдааны үеэр Ерөнхий сайд Г.Занданшатар БНХАУ-ын Төрийн зөвлөлийн Ерөнхий сайд Ли Чян нартай уулзахаар төлөвлөөд байна. 
ШХАБ-ын уулзалтын хүрээнд Аж үйлдвэр, эрдэс баялгийн сайд Г.Дамдинням ОХУ-ын Эрчим хүчний сайд С.Е.Цивилевтэй Москва хотноо уулзаж Газрын тосны импортын хэмжээг нэмэгдүүлэх талаар ярилцаж тохиролцлоо. 
Сайд Г.Дамдинням найрамдалт хоёр улсын хамтын ажиллагаа газрын тосны бүтээгдэхүүний чиглэлээр илүү нягт хамтран ажиллаж байгааг онцлон хэдий дотоодоо хомстолтой байгаа ч манай улсад тасралтгүй тогтвортой нийлүүлж байгаад талархал илэрхийлэв.
ОХУ-ын Эрчим хүчний сайд С.Е.Цивилев манай улсад нийлүүлж буй газрын тосны бүтээгдэхүүний хэрэглээ жил бүр өсөж буйг онцлоод цаашид тогтвортой найдвартай нийлүүлэх, "Газрын тосны бүтээгдэхүүний нийлүүлэх салбарт хамтран ажиллах тухай" хоёр улсын Засгийн газар хоорондын хэлэлцээрээр хүлээсэн үүргээ биелүүлж, газрын тосны бүтээгдэхүүнийг тогтвортой нийлүүлж ажиллахаа илэрхийлсэн байна.

Эх сурвалж: "Зууны мэдээ" сонин

2025 ОНЫ АРАВНЭГДҮГЭЭР САРЫН 19. ЛХАГВА ГАРАГ. № 219 (7716)