Д.АРИУН
Украины Хууль зүйн сайд Херман Галущенког Ерөнхийлөгч В.Зеленскийн дотны найз бизнесмэн Тимур Миндичийн авлигын схемд оролцсон гэх үндэслэлээр албан тушаалаас нь түдгэлзүүлэв. Энэ тухай Украины Ерөнхий сайд Юлия Свириденко мэдэгдсэн байна.
Галущенкогийн үүргийг түүний орлогч байсан Людмила Сугак гүйцэтгэнэ. Засгийн газрын ээлжит бус хуралдаанаар бүтцийн өөрчлөлт хийх шийдвэрийг гаргасан гэж Свириденко өөрийн Telegram сувагтаа бичжээ.
Тус улсад эрчим хүчний салбарын ээлжит авлигын дуулиан энэ оны эхээр дэгдсэн байна. Галущенко Хууль зүйн сайдаар томилогдохоосоо өмнө Эрчим хүчний сайдаар ажиллаж байсан учир олны анхаарлын төвд орсон байна.
Украины Авлигатай тэмцэх үндэсний товчооны (NABU) мөрдөн байцаагчид арваннэгдүгээр сарын 10-нд “Энергоатом” төрийн өмчит үйлдвэрийн газар, мөн тус улсын Ерөнхийлөгчийн ойрын хүрээний хүний нэг гэгддэг бизнесмен Тимур Миндичийн гэрт нэгжлэг хийсэн байна. Үүний дараа тус газраас хэсэг хүн авлига, санхүүгийн луйврын талаар ярилцаж байсан ярианы аудио бичлэгийг нийтэлжээ. Ярилцсан хүмүүсийн нэрийг хэзээ ч зарлаагүй гэж орон нутгийн хэвлэлүүд мэдээлжээ.
Эх сурвалж: polit.mn
