Д.АРИУН

2025 оны эхний есөн сард Вьетнамд ирсэн гадаадын жуулчдын тоо 15.4 саяд хүрсэн нь өнгөрсөн оны мөн үеийнхээс 21.5%-иар өссөн байна.

Тус улсын Статистикийн ерөнхий газрын мэдээлснээр, эх газрын Хятадаас эхний есөн сарын хугацаанд 3.8 сая хүн ирж, өмнөх оны мөн үеийнхээс 43%-иар өссөн үзүүлэлттэйгээр тэргүүлжээ. Вьетнамд хамгийн олон жуулчин нь очсон үзүүлэлтийг улс орноор гаргавал Хятадын араас Өмнөд Солонгос /3.2 сая/, Тайвань /926.000/, АНУ /622.000/, Япон /617.000/ удаалсан байна.  Үлдсэн 10-т Энэтхэг /504,000/, Камбож /489,000/, Орос /435,000/, Малайз /405,000/, Австрали /401,000/ багтжээ.

Аялал жуулчлалын мэргэжилтнүүд Вьетнам улсын амжилтыг визийн таатай бодлого, сурталчилгааны өргөн хүрээтэй кампанит ажил, үндэсний томоохон баяруудыг тэмдэглэн өнгөрүүлэх цуврал арга хэмжээнүүдтэй холбон тайлбарлаж байгааг VnExpress.net тэмдэглэсэн байна.

Өнгөрсөн наймдугаар сард тус улсын засгийн газар Бельги, Болгар, Хорват, Чех, Унгар, Люксембург, Нидерланд, Польш, Румын, Словак, Словени, Швейцарь  зэрэг 12 орны иргэдэд 45 хүртэл хоног визгүй зорчих эрх хөнгөлөлттэй нөхцөлийг бий болгосон. Ингэснээр Вьетнамын нэг талын визнээс чөлөөлж байгаа улс орны тоо 24, нийт визийн хөнгөлөлттэй улсын тоо 39 болжээ.

Вьетнам улс энэ онд 23-25 сая жуулчин хүлээн авах зорилт тавьсан гэдгийг орон нутгийн хэвлэлүүд мэдээлсэн байна.

Эх сурвалж: polit.mn