Nestle-ийн гүйцэтгэх захирал Лоран Фрейчет энэ албан тушаалдаа ердөө нэг жил ажилласан бөгөөд өнгөрсөн долоо хоногт доод албан тушаалтантайгаа хувийн дотно харилцаа үүсгэсний улмаас ажлаасаа халагджээ. Анхны шалгалтаар ямар нэгэн зөрчил илрээгүй ч хожим харилцаа нь батлагдсан. Фрейчетийн дотно харилцаатай байсан  хүний нэрийг зарлаагүй байна.

Хэвлэл мэдээллийн хэрэгслээр цацагдаж байгаа мэдээллээр бол Лоран Фрейчет тэр бүсгүйтэй 2022 онд буюу гүйцэтгэх захирал болохоосоо өмнө танилцсан гэж бичжээ. Тэр үед Фрейчет Латин Америк дахь Nestle-ийн хэлтсийг толгойлж байсан гэсэн үг аж.

Швейцарийн хууль тогтоомжоор нь ажил дээрээ хайр дурлалын харилцаатай байхыг  хориглодоггүй ч ихэнх томоохон компаниудад мөрдөж байгаа ёс зүйн зарчимд ил тод байхыг шаарддаг.

Фрейчет Nestle компанид 39 жил ажилласан ба карьерын хувьд хамгийн оргилд хүрсэн үедээ ийнхүү хайрын романсаас болж ажлаа орхиход хүрсэн байна. Одоо Nestle-ийн шинэ гүйцэтгэх захирлаар тус компанид 2001 оноос хойш ажиллаж байгаа Филипп Навратиль томилогдсон ба тэрээр дэд ерөнхийлөгчөөр ажиллаж байжээ. Гэхдээ  Nestle-ийн гүйцэтгэх захирал хайрын төлөө карьераа эвгүй байдалд оруулсан анхны захирал биш аж.

2023 онд “Бритиш Петролиум”-ийн гүйцэтгэх захирал Бернард Луни хамтран ажиллагсадтайгаа холбоотой асуудлаас болж огцорчээ.

McDonald's 2019 онд тус корпорацийн гүйцэтгэх захирал Стивен Истербрукийн оффисын хайр дурлал түүнийг ажлаас нь халснаар өндөрлөж байжээ. Стивен Истербрук 400 мянган долларын торгууль, удирдах албан тушаалд ажиллах эрхгүй болсон. Гэхдээ энэ явдал зөвхөн торгуулиар зогссонгүй. Истербрук компанид ихээхэн хэмжээний мөнгө буюу ойролцоогоор 105 сая долларыг буцааж өгөх шаардлагатай тулгарсан.

CNN-ийн ерөнхийлөгч Жефф Зукер  2022 онд Харилцаа холбооны албаны даргатай хайрын романс үүсгэсэн нь огцроход хүргэсэн.

Технологийн компанийн гүйцэтгэх захирал Энди Байрон 2025 оны зун Coldplay тоглолтын үеэр хүний ​​нөөцийн дарга Кристин Каботыг тэвэрч байгаа харагдсаныхаа дараа огцорсон. Тэднийг том дэлгэцээр харуулах үед Кабот нүүрээ гараараа дарж, Байрон нуугдахыг оролдож байгаа бичлэг дэлхий дахинаа тархсан. Тэврэлдэн зогсож буй нь дэлхийгээр нэг цацагдсан хоёр хоёулаа тогтсон гэр бүлтэй байсан гэдэг нь тодорхой болж, дуулиан шуугиан болж байсан билээ.

Эх сурвалж: polit.mn