БНХАУ-ын Тяньжин хотноо болж байгаа Шанхайн хамтын ажиллагааны байгууллагын дээд хэмжээний уулзалтад хүрэлцэн ирсэн улс орнуудын удирдагч нар хоёр талын уулзалт яриа хэлэлцээг эрчимтэй хийж байна. Бас аль улсын төрийн тэргүүн ямар улсын удирдагчтай уулзах вэ гэдгийг ч хэвлэлийнхэн анхааралтай ажиглаж мэдээлж байна. Барууны хоригт орсон Оросын нефтийг худалдаж авч байгаагаас болж АНУ-ын зүгээс дарамт шахалтад өртөөд байгаа Энэтхэгийн Ерөнхий сайд Нарендра Моди БНХАУ-ын дарга Ши Жиньпинтэй өчигдөр буюу наймдугаар сарын 31-нд уулзсан. Хоёр улс дайсагналцахгүй гэдгээ албан ёсоор зарласан. Харин өнөөдөр /2025.09.01/ тэрээр ОХУ-ын Ерөнхийлөгч Владимир Путинтэй уулзаж яриа хэлэлцээ хийлээ. Хоёр удирдагч уулзалт болох газар руу явахдаа нэг машинд сууж явсан ба машинаасаа буухгүйгээр нэлээд удаан сууж ярилцсан гэж хэвлэлүүд мэдээлжээ. Нарендра Моди Оросын Ерөнхийлөгчин Аурус машинд сууж байгаа зургаа Х сүлжээнд оруулсан байна. Тэрээр "Ерөнхийлөгч Путин бид хоёр хоёр талын уулзалт болох газар руу хамтдаа аялсан. Түүнтэй хийсэн яриа үргэлж гүн гүнзгий байдаг” гэж бичиж нийтэлжээ. Мөн В.Путинтэй тэврэлдэн уулзаж байгаа зургаа "Тантай уулзахдаа үргэлж таатай байна" гэсэн тайлбартайгаар оруулсан байна. Тэдний харилцаа дэлхий нийтийн анхаарлын төвд байгаа энэ үед уулзаж байна.
Эх сурвалж: polit.mn