Шанхайн хамтын ажиллагааны байгууллага (ШХАБ)-ын гишүүн орнуудын удирдагчид БНХАУ-ын Тяньжин хотноо болсон дээд хэмжээний уулзалтын үр дүнд тунхаглал батлав.

Дээд хэмжээний уулзалт наймдугаар сарын 31-нээс есдүгээр сарын 1-ний хооронд болж байгаа бөгөөд 20 гаруй улсын удирдагчид, олон улсын 10 байгууллагын төлөөлөл оролцож байна.

Тяньжиний тунхаг бол дээд хэмжээний уулзалтын гол баримт бичиг юм. ОХУ-ын ерөнхийлөгчийн туслах Юрий Ушаковын тайлбарласнаар "Бүс нутгийн болон олон улсын өнөөгийн тулгамдсан асуудлууд, тэр дундаа эдийн засгийн салбарт нэгдсэн арга барилыг тусгаж, үйл ажиллагааны чиглэл тус бүрээр байгууллагын ажлын зорилгыг тодорхойлсон" гэжээ.

ШХАБ нь 2001 оны зургадугаар сарын 15-нд Шанхай хотод байгуулагдсан. Эхний ээлжинд Орос, Казахстан, Киргизстан, Хятад, Тажикистан, Узбекистан гэсэн зургаан орон үүсгэн байгуулж нэгдсэн. 2017 онд Энэтхэг, Пакистан, 2023 онд Иран, 2024 онд Беларусь улс тус холбооны гишүүн болсон. Монгол Улс нь ШХАБ-ын ажиглагч гэдэг статустай. Тяньжинд болж байгаа ШХАБ-ын дээд хэмжээний уулзалтад Монгол Улсын Ерөнхийлөгч У.Хүрэлсүх оролцож байгаа билээ.

Эх сурвалж: Polit.mn