Фото: Анатолий Кривоножко. /globalpress/

Украйны Зэвсэгт хүчний Агаарын цэргийн шинэ командлагч, дэслэгч генерал Анатолий Кривоножкогийн ээж ОХУ-ын Белгород мужийн Шебекинский тойрогт амьдарч байсан. Өндөр настай эмэгтэй хэд хэдэн удаа цус харваж, хэвтэрт байж байгаад саяхан нас барсан гэж телеграмын Shot суваг мэдээлснийг оросын хэвлэлүүд иш татсан байна.

Shot-ийн мэдээллээр, Украйны генералын ээж 101 нас хүрсэн бөгөөд хүү нь түүнтэй холбоо тасарсан байжээ. Настай эмэгтэй өөрийн хоёр дахь хүү болон бэрийнхээ асрамж дор амьдарч байсан гэдгийг хэвлэлийн мэдээнд дурджээ. Хэвлэлүүдийн мэдээнд өдгөө Украйны цэргийн өндөр албан тушаалтан болсон  генерал ээжийгээ нас барахаас өмнө болон дараа хамаатан садангуудтайгаа холбогдоогүй болохыг тэмдэглэсэн байна.

Генералын ээжийн төрөлх Шебекинский орчим нь  Украйны талаас тогтмол галд өртдөг бүс нутагт.  Хэдийгээр хот суурин нь байнга их бууны галд өртсөөр ирсэн ч гэлээ  ар гэрийнхэн нь, нутгийнхан нь генерал хүүгээс нүүр буруулалгүй, харин ч хүндэлсээр ирсэн тухай дурджээ.

Генералын ээж залуудаа цэрэг эх оронч хөдөлгөөнд идэвхтэй оролцож байсан бөгөөд эх орны дайны жилүүдэд Белгород мужид танк эсэргүүцэх шуудуу, нуувч ухах ажилд дайчлагдан оролцож байжээ. Үүнийхээ төлөө “1941–1945 оны Эх орны дайнд шударгаар хөдөлмөрлөсний төлөө” медалиар шагнуулж байсан эмэгтэй аж.

Үүнээс өмнө оросын хэвлэлүүдээр Украйны цэргийн өөр нэг өндөр албан тушаалтан болох Украйны Зэвсэгт хүчний ерөнхий командлагч Александр Сырский Орост амьдарч буй өндөр настай эцэг эхийнхээ эмчилгээний зардалд зориулж нэг сая рублийн тусламж илгээсэн тухай мэдээлж байсан билээ.

Эх сурвалж: polit.mn