Д.АРИУН

Бүгд найрамдах Киргиз улсын Ерөнхийлөгч асан Алмазбек Атамбаевт 11 жил 6 сар хорих ял оноосон шүүхийн шийдвэр өчигдөр гарчээ. Бишкек хотын Первомайский дүүргийн шүүхээс  экс Ерөнхийлөгчийг  2019 онд Кой-Таш хотод болсон үймээн самуун болон бусад хэд хэдэн хэрэгт буруутай гэж үзэж ялласан байна. Тодруулбал, Алмазбек  Атамбаевыг хууль бусаар хөрөнгөжсөн, хууль бусаар газар эзэмшиж авсан, 2019 онд Кой-Таш хотод болсон үймээн самууныг зохион байгуулсан хэрэгт буруутгаж байсан юм.

Шүүхийн тогтоолд “Алмазбек Шаршенович Атамбаевын хууль бусаар олсон хөрөнгийг хурааж, төрийн шагналыг хүчингүй болгож, 11 жил зургаан сар хорих ялыг эцэслэн тогтоосон” гэж дурдсаныг гэж орон нутгийн хэвлэлүүд мэдээлжээ.

Экс Ерөнхийлөгчийг ялласан хэрэгт хамт шүүгдэгчдийн тоонд парламентын хэд хэдэн гишүүн асан, мөн бие хамгаалагч болон Ерөнхийлөгчийн Тамгын газрын даргаар ажиллаж байсан хүмүүс шалгагдаж, тэдний зарим нь гэм буруутай нь тогтоогдсон тул ял авчээ.

Шүүхийн тогтоол нь Киргизийн экс Ерөнхийлөгчийг байхгүйд буюу эчнээгээр оноож байгаа ял болж байна. Учир нь тэрээр 2023 оны хоёрдугаар сард Испани улсад эмчлүүлэхээр явснаасаа хойш эх орондоо эргэж ирээгүй байгаа аж.

Алмазбек Атамбаевт өөрийг нь болон түүний хамтран зүтгэгчдийг улс төрийн зорилготойгоор буруутгаж байна гэж мэдэгдэж байжээ.

Алмазбек Атамбаев нь 2011-2017 онд Киргизийн ерөнхийлөгчөөр ажиллаж байсан. 2019 оны наймдугаар сарын 8-нд Атамбаевыг тусгай албаныхан, цагдаагийн хэдэн зуун ажилтны оролцоотойгоор 24 цаг үргэлжилсэн ажиллагааны явцад баривчилсан. Энэ ажиллагааны үеэр олон хүн бэртэж гэмтсэн талаар тухайн үед хэвлэлүүд мэдээлж байжээ. Мөрдөн шалгах явцад Ерөнхийлөгч асны гэрээс олон тооны галт зэвсэг хураан авч, түүнийг хорьж, улмаар Киргизийн парламент 2019 оны долдугаар сарын 27-ны өдөр Атамбаевын экс ерөнхийлөгчийн статус, халдашгүй байдлыг цуцалсан байдаг.

Алмазек Атамбаев 2023 оны хоёрдугаар сард суллагдаж, гадаадад эмчлүүлэх зөвшөөрөл авч, хүүгийнхээ хамт Киргизээс Дубайгаар дамжин ниссэн, 2024 онд тус улсын хуучин Ерөнхийлөгч Испанид байгааг харуулсан бичлэг нийгмийн сүлжээнд гарч ирсэн нь киргизийн олон нийтийн дунд ихээхэн маргаан шүүмжлэл дэгдээсэн гэж asiaplus сайтын мэдээнд дурдсан байна.

Эх сурвалж: Polit.mn