Фото: wikipedia.org

Д.АРИУН

Польш улсад өнгөрсөн амралтын өдрүүдэд Ерөнхийлөгчийн сонгуулийн хоёр дахь шатны санал хураалт болж, тус улсын иргэд шинэ Ерөнхийлөгчөө сонголоо. Сонгуулийн хорооны албан ёсны цахим хуудаст саналын хуудсыг 100 хувь тоолж дууссаны дараах дүн мэдээг албан ёсоор байршуулж, сөрөг хүчний Хууль шударга ёсны нам-аас нэр дэвшигч Карол Навроцки олонхийн санал авсныг баталгаажуулжээ. Тэрээр сонгогчдын 50,89 хувийн санал авсан байна. Польшийн сонгуулийн хорооны мэдээгээр бол ялалт байгуулсан нэр дэвшигч 10 сая 606 мянга, 628 санал авчээ. Түүний өрсөлдөгч болох тус улсын эрх барьж байгаа Иргэний эвслээс нэр дэвшигч Рафал Трзасковский 49,11 хувийн санал авчээ.

Бүс нутгаар авч үзвэл Польшийн зүүн хэсэгт Карол Навроцки өрсөлдөгчөөсөө илүү санал авсан бол, нийслэл Варшавт Рафал Трзасковский илүү дэмжлэгтэй байж, хотын сонгогчдын 68 хувь давсан саналыг өөртөө цуглуулж чаджээ.

Олон улсын хэвлэлүүдийн мэдээллээс үзвэл, ялалт байгуулсан нь тодорхой болоод байгаа Карол Навроцки төрөлх Гданьск хотынхноосоо бага дэмжлэг авсан байна. Тодруулбал, тус хотын сонгогчдын 30 хүрэхгүй хувь нь түүний төлөө саналаа өгсөн байна.

Польшийн Ерөнхийлөгчөөр сонгогдоод байгаа Карол Навроцки нь 1983 онд Гданьск хотод төрсөн. Төрөлх хотдоо их сургуульд суралцаж төгссөн. Тэрээр оросын эсрэг хурц хурц мэдэгдэл хийдгээр Европын улс төрийн хүрээнд алдартай. Тэгсэн атлаа Украйныг Европын холбоо, Умард атлантын цэргийн эвсэл /НАТО/-д элсүүлэхийг эсэргүүцдэг нэгэн. Өмнө нь хэлж байсан үг, хийж байсан мэдэгдлүүдэд нь анализ хийсэн хэвлэлүүдийн мэдээгээр бол Польшийн шинээр сонгогдсон Ерөнхийлөгч Украйны талаар нэлээд хатуу байр суурь илэрхийлж магадгүй гэсэн байна.

Эх сурвалж: polit.mn