Трампын тариф эдийн засгийн уналт авчрах уу

Нүүр

Геополитик

Трампын тариф эдийн засгийн уналт авчрах уу

2025-04-01

Нийтэлсэн: Админ

2 мин унших

ХУВААЛЦАХ

ЖИРГЭХ

Б.НЯМСҮРЭН

АНУ-ын Ерөнхийлөгч Дональд Трамп Цагаан ордонд эргэн ирснээс хойшхи хамгийн том эдийн засгийн бодлогын шинэчлэлт ирэх лхагва гарагаас эхлэн хэрэгжих гэж байна. Америкийн “Чөлөөлөх өдөр” хэмээн Трампын зүгээс нэрлэж байгаа энэ бодлогын хүрээнд АНУ-тай худалдаа хийж буй улс орнууд харилцан ижил татвар төлөх, ингэснээр өнгөрсөн онд гэхэд 1.2 их наяд ам.долларт хүрсэн АНУ-ын худалдааны алдагдлыг бууруулах үндсэн зорилготой юм. Тарифыг нэмэгдүүлснээр Америкийн худалдааны оргил үе ирж, дотоодын үйлдвэрлэл нэмэгдэх болно хэмээн ерөнхийлөгч Трамп харж байна. Тэр хоёр дахь удаагаа ерөнхийлөгчөөр сонгогдохдоо “Америкийг дахин агуу болгохын төлөө” хэмээн уриалан гарч ирсэн. Тиймээс энэ уриагаа хоосон лоозон байлгахгүйн тулд улс орнуудтай худалдааны тэнцэлтэй ашигтай хамтрах, эсвэл өндөр татвар төл хэмээн шахалт үзүүлж байгаа нь Трампын хэмээн нэрлэгдэж буй “Худалдааны дайн”-аар илэрч буй.

“Худалдааны дайн”-ы хүрээнд Трамп тус улсын хамгийн том худалдааны түнш Канад, Мексик, Хятадын бараа бүтээгдэхүүнээс гадна импортын бүх ган, хөнгөн цагааны бараа, гадаадын автомашин, автомашины сэлбэг хэрэгсэлд 25 хувийн татвар ногдуулахаар болсон. Тэр өнгөрсөн долоо хоногт хөрш Канад улсын шинэ Ерөнхий сайд Марк Карнитай татварын асуудлаар ярилцсан бөгөөд хоёр улсын удирдагч аль аль нь тун тааламжтай уулзалт болсон хэмээн дүгнэсэн ч ирэх лхагва гарагаас хэрэгжих тариф Канадын бараа бүтээгдэхүүнд ч мөн хамаатай хэвээр байна. Энэ сарын 2-ноос эхлэн цахилгааны хагас дамжуулагч, микрочип, эмийн импортын бүх бүтээгдэхүүнд 25 хувийн татвар ногдуулах шийдвэр хэрэгжиж эхлэх юм. Мөн дарсны импортод ч энэ харилцан татвар ногдож байгаа учир АНУ-ын олон жилийн түнш Европын Холбооны улс орнуудад, тэр дундаа дарсны үйлдвэрлэлд гойд байр суурь эзэлдэг Итали, Франц, Бразил зэрэг улс орнууд ч энэ татварт хамаарч эхлэх нь. Тэгвэл Трампын худалдааны дайны энэ нөлөө зөвхөн бүс нутгийн төдийгүй дэлхийн эдийн засат төсөөлж байснаас богино хугацаанд сөргөөр нөлөөлж болзошгүй болж байгааг эдийн засгийн шинжээчид дүгнэн бичиж байна.