Фото: Түймрийг унтраахад нисдэг тэрэг ашигласан байна. Өмнөд Кёнсан мужийн захиргаа.

К.АНУ

БНСУ-ын зүүн өмнөд бүс нутагт хүчтэй салхины улмаас хээрийн түймэр дэгдэж, дор хаяж дөрвөн хүн амиа алдаж, зургаан хүн гэмтэж, 1500 орчим хүнийг нүүлгэн шилжүүлсэн тухай тус улсын зүүн өмнөд бүсийн гамшгийн албаныхан энэ ням гариг /2025 03 23/-т мэдээлжээ.

Yonhap агентлагийн мэдээнд дурдсанаар бол, Сөүлээс зүүн өмнө зүгт 250 км-ийн зайд орших Санчон мужид өнгөрсөн баасан гаригт түймэр эхэлж, улмаар ойр орчмын бүс нутагт  тархсан байна.

Түймрийн улмаас бэртэж, эмнэлэгт хүргэгдсэн зургаан хүний тав нь  хүнд гэмтэл авчээ. Гамшиг, аюулгүй байдлын эсрэг төв штабаас мэдээлснээр бүх хохирогчийг Санчон хотоос олсон байна.

"Хуурай цаг агаарын улмаас хээрийн түймэр хурдацтай тархаж, хүмүүсийн амь насанд заналхийлж байна" гэж Гамшгаас хамгаалах албаны  дэд дарга Ли Хан Кюн хэлсэн ба алба нь түймрийг унтраахын тулд бүх хүчээ дайчлан ажиллана гэсэн байна.

Одоогийн байдлаар нийт 4600 орчим хөлбөмбөгийн талбайтай тэнцэх 3286.11 га талбай шатаж, Хойд Кёнсан мужийн Юусеонг болон Санчонд тус тус 1000 гаруй га талбай шатсан гэсэн тооцоо гарчээ.

Эрх баригчид түймрийг унтраах ажлыг үргэлжлүүлж байгаа ба 1500 орчим оршин суугчийг түр хоргодох байранд нүүлгэн шилжүүлсэн гэж Yonhap агентлагийн мэдээллээ.

Эх сурвалж: polit.mn