Тажикистан улсын ерөнхийлөгч Эмомали Рахмон, Киргизстан улсын Ерөнхийлөгч Садыр Жапаров нар. 2025 03 13.

К.АНУ

Киргизстан, Тажикистан улсууд хилийн асуудлаар олон жил үргэлжилсэн маргаанд цэг тавьжээ. Гуравдугаар сарын 13-нд Бишкект Киргизстан болон Тажикистан улсын ерөнхийлөгч нар улсын хилийн тухай  түүхэн гэрээнд гарын үсэг зурав.

Тажикистан улсын ерөнхийлөгч Эмомали Рахмон Бүгд Найрамдах Киргиз Улсад хийсэн төрийн айлчлалын үеэр энэ түүхэн үйл явдал Бишкек хотод болсон гэж Тажикстаны Ерөнхийлөгчийн хэвлэлийн алба мэдээлсэн байна.  Эмомали Рахмон "Өнөөдөр бид түүхэн шийдвэр гаргаж байна" гэж онцлон тэмдэглээд, энэхүү гэрээ нь бат бөх харилцааны үндэс суурийг тавьж байна гэж хэлсэн байна.  Садыр Жапаров хэлэхдээ, Тажик-Киргизийн хилийн заагийг тогтоох, тогтоох асуудлаарх Засгийн газрын комисс үр дүнтэй ажиллаж байгааг онцолжээ.  Мөн тэрбээр  энэхүү гэрээгээр 101 жил шийдэгдээгүй байсан хилийн асуудлыг эцэслэн шийдвэрлэж, Төв Азид “мөнхийн амар амгаланг” тогтоосон гэж  мэдэгдсэн байна.  

Хилийн маргаантай асуудлыг шийдсэн гэрээнд хоёр улс гарын үсэг зурсныг ШХАБ болон НҮБ сайшааж, бүс нутгийн тогтвортой байдалд чухал ач холбогдолтойг тэмдэглэв. НҮБ-ын Ерөнхий нарийн бичгийн дарга Антонио Гутерриш энэхүү түүхэн амжилтад хоёр улсад баяр хүргэсэн байна.

Ерөнхийлөгч нар мөн эдийн засгийн хамтын ажиллагааг бэхжүүлэх Засгийн газар хоорондын хамтарсан зөвлөл байгуулахаар тохиролцсон бол, Садыр Жапаров Төв Азийн орнуудын хооронд визгүй дэглэм тогтоох санаачилга дэвшүүлжээ.

Эмомали Рахмон, Садыр Жапаров нар түүхэн гэрээнд гарын үсэг зурснаар өмнө нь хаалттай байсан хоёр улсын хилийн шалган нэвтрүүлэх боомтыг нээжээ.  Тодруулбал, хоёр улсын хилийн Кызыл-Бел-Авторожный, Кайрагач-Авторожный шалган нэвтрүүлэх боомтын нээлтэд Киргизстан, Тажикистан улсын ерөнхийлөгч нар цахимаар оролцсон байна. Тажикистаны Үндэсний аюулгүй байдлын улсын хорооны дарга Саймумин Ятимов Киргизийн хэвлэлд өгсөн ярилцлагадаа “Бүх шалган нэвтрүүлэх цэгийг нээх асуудлыг үндсээр нь шийдсэн. Хоёрыг нь албан ёсоор нээж, бусад нь даган нээгдэх болно” гэсэн байна.

“Үнэхээр түүхэн, удаан хүлээсэн энэхүү үйл явдал хоёр орны харилцаанд шинэ хуудас нээсэн нь хамтын ажиллагааны 16 шинэ баримт бичигт гарын үсэг зурснаар нотлогдож байна” гэж тус улсын asia+ агентлагийн мэдээнд дурдсан байна.

Эх сурвалж: polit.mn