К.АНУ

Израилийн Ерөнхий сайд Биньямин Нетаньяхугийн ажлын алба Палестины Хамас хөдөлгөөнтэй барьцаалагдсан болон хоригдлуудыг суллах, Газын зурваст гал зогсоох гэрээнд гарын үсэг зурснаа баталгаажууллаа гэж Израилийн "The Jerusalem Post" сонин нэгдүгээр сарын 17-ны баасан гарагт мэдээлэв . Мөн эцсийн гэрээнд АНУ, Катар хоёр гарын үсэг зурсан байна.

Бенжамин Нетаньяху © Shutterstock/Fotodom

Хэлэлцээрийг батлахын тулд Аюулгүй байдлын сайд нарын танхимыг хуралдуулна. Мөн Израилийн Засгийн газрын хуралдаж, нэгдүгээр сарын 18-нд хэлэлцээрүүдийг хэрэгжүүлэх төлөвлөгөөг батлах ёстой аж.

Баримт бичигт гарын үсэг зурахдаа санал зөрөлдөөн, удаашралтай байгаа тул Газын зурвасаас барьцаалагдсан эхний гурван иргэнийг өмнө нь төлөвлөж байсанчлан ням гарагт бус нэгдүгээр сарын 20-ны Даваа гарагт суллах болно гэж тус сонины мэдээнд дурджээ.

Мөн Axios порталын мэдээлснээр, АНУ-ын талын гэрээнд Цагаан ордны Үндэсний аюулгүй байдлын зөвлөлийн Ойрхи Дорнод, Хойд Африкийг хариуцсан зохицуулагч Бретт МакГурк гарын үсэг зурсан байна. АНУ-ын Ерөнхийлөгчөөр сонгогдсон Дональд Трампын Ойрхи Дорнодын асуудал хариуцсан тусгай элч Стивен Виткофф  хэлэлцээрийг хийхэд оролцож ажилласан байна.

Эх сурвалж: Polit.mn