Т.БАТСАЙХАН

Азербайжаны нийслэл Баку хотноо НҮБ-ын Уур амьсгалын өөрчлөлтийн тухай конвенцын Талуудын 29 дүгээр бага хурал болж байна. Тус хуралд Монгол Улсын Ерөнхийлөгч Ухнаагийн Хүрэлсүх оролцож байгаа юм.  Азербайжан улсын тухай сонирхолтой баримтуудыг хүргэе.

-Бүгд Найрамдах Азербайжан Улс нь Ерөнхийлөгчийн засаглалтай бөгөөд энэ нь улс төрийн хувьд тогтвортой байх нөхцөлийг бүрдүүлдэг. Ерөнхийлөгч И.Алиев өөрийн эцгийг залгамжлан 2003 оноос хойш засгийн эрхийг барьж байна. 2017 онд Үндсэн хуульд өөрчлөлт оруулах замаар өөрийн эхнэр Мехрибан Алиеваг дэд ерөнхийлөгчөөр томилсон.

-Парламентын сонгууль нь таван жилд нэг удаа болдог бөгөөд мажоритар тогтолцоогоор гишүүдийг сонгодог. Сонгуулийн 125 тойрогтой.

-Хэдийгээр нийгмийн тэгш бус байдал, тухайлбал, орлогын шударга бус хуваарилалт, ажилгүйдэл, ядуурлын түвшин өндөр зэргээс хамаарч эрх баригчдын нэр хүнд ард түмний дунд унаж байсан ч, 2020 оны 11 дүгээр сард зэвсгийн хүчээр Карабахын алдагдсан газар нутагт хяналтаа бүрэн тогтоож чадсан нь эрх баригчдын нэр хүндийг өсгөж бэхжүүлсэн.

-ОПЕК-ийн гишүүн орны хувиар газрын тосны олборлолтоо 2020 оны дөрөвдүгээр сараас хоёр жилийн хугацаанд багасгах үүрэг хүлээсэн ч газрын тосны зах зээлд дээрх үнэ өндөр байгаа тул газрын тосноос олох орлогод нь сөргөөр нөлөөлөөгүй.

-Газрын тос, байгалийн хийн томоохон экспортлогч орон тул төсвийн алдагдал нь харьцангуй бага байдаг ч дэлхийн зах зах зээл дэх газрын тосны үнээс шууд хамааралтай.

- Азербайжан нь 26.0 сая тн газрын тос экспортолж, 15,4 тэрбум ам.долларын орлого олсон бол 2022 оны мөн үед 26,2 сая тн газрын тос экспортолж, 19,1 тэрбум ам.долларын орлого олж байжээ. Энэ нь худалдааны эерэг тэнцэлд Орос-Украины мөргөлдөөний улмаас дэлхийн зах зээл дээрх газрын тос, байгалийн хийн үнийн өсөлт хэрхэн нөлөөлж байгааг харуулж байна.

-Тус улсын гадаад худалдааны түнш томоохон таван орныг дурдвал, Итали, Турк, Израил, Грек, Энэтхэг байна.

-Азербайжаны байгалийн хийг Каспийн Шах Дениз орд газраас эхтэй 1850 км үргэлжилсэн Транс Анатолийн хийн хоолойгоор /ТANAP/, Транс Адриатын /ТАР/ хоолойгоор дамжуулан Италид хүргэдэг.

-Эдийн засгаа солонгоруулахын тулд Засгийн газраас хөдөө аж ахуй, сансрын хиймэл дагуул, өндөр технологийн салбар, тээвэр, аялал жуулчлалын салбарт ихээхэн ач холбогдол өгч байна.

-Олон соёл иргэншил, худалдааны замын уулзварт оршдог газар зүйн ашигтай байрлал, газрын тос, байгалийн хийн асар их нөөцтэй Азербайжан Улсын гадаад бодлогын нэн тэргүүний зорилт нь нэгдүгээрт, аливаа цэргийн эвсэлд нэгдэхгүйгээр, бүс нутагт дефакто-төвийг сахисан бодлого баримтлахад оршдог. 

-Азербайжан нь гадаадын улс орнуудтай хоёр талын харилцааг хөгжүүлэхэд анхаарлаа хандуулдаг. 2024 оны байдлаар тус улс нь гадаадын 85 улс, олон улсын байгууллагад Дипломат төлөөлөгчийн газартай байна.

Эх сурвалж:www.polit.mn