Ч.БЯМБАХАЖИД  

Сэтгүүлч Н.Өнөрцэцэгт холбогдох хэргийн Давж заалдах шатны шүүх хурал өнөөдөр 10:00 цагт  Нийслэлийн Давж заалдах шатны шүүхэд хаалттайгаар эхэлсэн юм. Шүүх хурлыг нээлттэй явуулах хүсэлтийг Н.Өнөрцэцэг болон түүний өмгөөлөгч нар гаргасан ч Нийслэлийн Давж заалдах шатны шүүхээс маш нууцын зэрэглэлд хамаарах хавтаст хэрэг үүсгэсэн. Тиймээс зарим хэсгийг нь авч нээлттэй явуулах боломжгүй хэмээн мэдэгдсэн юм. Сүхбаатар дүүргийн Эрүүгийн Хэргийн анхан шатны шүүхээс 2024 оны долдугаар сарын 19-нд сэтгүүлч Н.Өнөрцэцэгт: “нэр бүхий дөрвөн иргэн, нэг хуулийн этгээдийн нэр төр, алдар хүнд, ажил хэргийн нэр хүндэд халдсан, илт худал мэдээлэл олон нийтэд тараасан, Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүй цахим сүлжээнд ашиглаж, задруулсан, Татвар төлөгч хувь хүн, хуулийн этгээдийн удирдах, гүйцэтгэх албан тушаалтан татвар төлөхөөс зайлсхийх зорилгоор их хэмжээний татвар ногдуулах орлогоо зориуд худал тодорхойлсон, нуусан, Татвар төлөхөөс зайлсхийх гэмт хэргийн улмаас олсон орлогыг мэдсээр байж ашигласан гэх үндэслэлүүдээр гэм буруутайд тооцож дөрвөн жил есөн сарын хорих ял оноосон юм.   

Шүүх хуралтай холбоотойгоор шүүхийн танхимын гадаа түүний ар гэрийнхэн, хэвлэл мэдээллийн төлөөлөл, зарим УИХ-ийн гишүүд ирж байр сууриа илэрхийллээ.  

Ц.Оюунгэрэл: Сэтгүүлзүйн салбарт гарсан алдааг нэгдүгээрт эрүүжүүлнэ гэдэг бол хамгийн харгис дэглэм:  “Давж заалдах шатны шүүх бол анхан шатны шүүхийн алдааг засах ёстой. Манай шүүхэд өөр өөрийгөө засах систем ажиллаж байгаа эсэхийг өнөөрийн шүүх хурлаас харах гэж байна. Анхан шатны шүүх дээр процессийн алдаа гарч, өмгөөлүүлэх эрх алдагдсан гэж үзэж байгаа. Түүнчлэн сэтгүүлзүйн эрх, эрх чөлөөт байдлыг хүндэлж байгаа эсэх, хувь хүний өмгөөлүүлэх болон өөрийгөө өмгөөлөх эрх, татварын ямар нэгэн алдаа гарахад шууд эрүүжүүлэх нь зөв үү, татварын системийн процесс энд хэрэгжиж чадах эсэх асуудлуудыг шийдэж өгөх зангилаа цэг нь өнөөдрийн шүүх хурал юм” гэлээ. 

Эх сурвалж: www.polit.mn