З.БАТЦЭЦЭГ

Олон гэр бүлд хүүхдүүдийн өглөөний цайнд сүүнд өглөөний хоол хийж өгдөг уламжлал байдаг. Гадуур явахдаа чихэр, бялуу авах гэсэн хүүхдийн хүсэлтийг эсэргүүцэж чаддаг ээжүүд ховор байдаг.

Амтат баар, чихэр, шоколад, гурилан бүтээгдэхүүн, хийжүүлсэн ундаа, чихэрлэг шүүс мэт нь хүүхдүүдийн өдөр тутмын хоолны цэсэд байсаар байна. Гэхдээ хүүхдийн эмч, хоол тэжээлийн мэргэжилтнүүд эрүүл мэндэд ихээхэн хор хөнөөл учруулж, ирээдүйд хэт таргалалтад хүргэж болзошгүй ийм төрлийн хоолыг хүүхдэдээ өгөхгүй байхыг эцэг эхчүүдэд анхааруулж байна.

"RBC Life" сэтгүүл хүүхдээ чихрээс хэрхэн салгах талаар мэргэжилтний зөвлөгөөг  нийтэлснийг хүргэж байна.

Бүү хоригло

Хүүхдэд чихэр идэхийг хориглох ёсгүй. Энэ нь сөрөг хариу үйлдэл үзүүлж илүү их сонирхол татах болно. Хэрэв хүүхэд чихэрлэг зүйл авахыг хүсэж байвал яаж ийгээд авах л болно гэж хоол тэжээлийн мэргэжилтэн, Оросын хоол тэжээлийн мэргэжилтнүүдийн нийгэмлэгийн гишүүн Залина Вартанян анхааруулав.

Тэрээр “Бид хүүхдүүдийг амттан, боовоор дайлдаг уламжлалтай нийгэмд амьдарч байна. Энд байгаа цорын ганц сонголт бол үүнтэй эвлэрэх явдал юм. Мөн эцэг эхчүүд хүүхдүүддээ чихэргүй цай ууж, жимс жимсгэнэ, хатаасан жимсийг илүү олон удаа санал болгож, эрүүл амттан бэлтгэхийг хичээж болно. Хамгийн гол нь хоол тэжээлийн талаар хувийн үлгэр дуурайл үзүүлэх нь чухал” гэв.

Чихрээр тайвшруулж болохгүй

Олон эцэг эхчүүд хүүхдээ амттанаар тайвшруулахыг хичээдэг. Бага наснаасаа бий болсон энэ зуршил нь насанд хүрсэн хойноо ч хоолоор өөрийгөө тайвшруулах уламжлал болж хувирдаг. Тиймээс сэтгэл хөдлөлийн үед та хүүхдийнхээ анхаарлыг амттан дээр төвлөрүүлэх ёсгүй. Гэхдээ хэрэв хүүхэд гуйвал хорьж болохгүй. Тэр хүслээ ямар ч хориггүйгээр хангах ёстой.

Чихрээр урамшуулж болохгүй

Хүүхдүүд амттаныг урамшуулал гэж ойлгох нь ихэвчлэн насанд хүрэгчид өөрсдөө бий болгосон ойлголт гэж хоол тэжээлийн мэргэжилтэн Наталя Круглова хэлэв. Эмч өөрийн Telegram сувагтаа сайн зан авир эсвэл тоглоомоо хураалаа гэж чихэр амлаж болохгүй гэж тайлбарлав. Амттан нь шагнал болж болохгүй. Н.Кругловагийн хэлснээр амьдралын эерэг мөчүүдийг хүүхдийн ойлголтод чихэрлэг зүйлээр биш, харин зугаатай тоглоом, зугаалга, үзвэр үйлчилгээ, кино үзэх зэргээр дүрслэх нь дээр гэсэн юм.

Хүүхэдтэйгээ "ойлгомжтой" хэлээр ярь

Чихрийг "муу" эсвэл "хортой" гэж нэрлэж болохгүй. Түүний оронд яагаад хэт их чихэр идэж болохгүй, яагаад чихэр ердийн хоолыг орлохгүй байгааг тайлбарласан нь дээр.

“Хүүдээ хүнсний ногоо, жимс жимсгэнэ бидний хэрэгцээт амин дэмийг агуулдаг ч чихэрт бараг байдаггүй гэж хэлдэг. Би түүнд витаминууд биднийг хүчирхэг, уян хатан, эрүүл болгодог гэдгийг түүний ойлгодог хэлээр хэлдэг. Одоо тэр хоолны эслэг, гэдэс доторх ашигтай бичил биетний талаар мэддэг болсон" гэж доктор Н.Круглова жишээгээр хэлэв.

Гэрт байгаа амттаныг багасгахыг хичээ

Хүүхэдтэйгээ амттаны хэмжээг ярилцаж, өдрийн цагаар юу идэж байгаагаа хянахыг хүс. Хэрэв хүүхэд наснаас шалтгаалж үүнийг даван туулж чадахгүй бол хяналт нь насанд хүрэгчдэд хамаарна. Жишээлбэл, өглөө нь нэг хайрцаг чихэр аваад, тэр өдөр идэж болох хоёр ширхгийг сонгоод, үлдсэнийг нь хүүхдийн хараанаас хол байлга. Энэ арга нь 4-5 насны хүүхдэд сайнаар нөлөөлдөг гэж хоол тэжээлийн мэргэжилтэн Н.Круглова хэлэв

Хоолыг амттанаар орлохгүй

“Чихэр идэх цаг хугацааны дүрмийг дагаж мөрдөөрэй. Энэ нь амттаныг үндсэн хоолны дараа идэх ёстой юм. Хүүхэлдэйн кино үзэж, тоглож байхдаа идэхгүй байх нь чухал. Ээж хүний хувьд миний үүрэг бол амттаныг ердийн хоолны дэглэмд хэрхэн оруулахыг заах явдал юм" гэж эрүүл хооллолтын мэргэжилтэн хэлэв.

Чихрийн хэт их хэрэглээ нь хооллох зан үйлийг алдагдуулдаг. Хүүхдийн амт өөрчлөгдөж, элсэн чихэр агуулаагүй хоол идэхээс татгалзаж, хүнсний ногоо, жимс жимсгэнэ, сүүн бүтээгдэхүүн, махан бүтээгдэхүүн идэхээ больсон. Бие махбодод шаардлагатай шим тэжээл, микроэлемент, витаминыг хангалттай хэмжээгээр авч чаддаггүй бөгөөд амттан идэх зуршил нь эцэстээ жин нэмэх, улмаар 2-р хэлбэрийн чихрийн шижин өвчнийг үүсгэдэг. Тиймээс гурван нас хүрээгүй хүүхдэд эрүүл хооллолтын зуршлыг бий болгохын тулд амттаныг хоолны дэглэмээс бүрэн хасах нь дээр. Том хүүхдийн өдөр тутмын элсэн чихрийн хэмжээ нь өдөр тутмын илчлэгийн 10 хувиас хэтрэхгүй байх ёстой

Өмнө нь хүүхдийн харшлын эмч-дархлаа судлаач Анастасия Козырева эцэг эхчүүдэд хүүхдэдээ хийжүүлсэн нимбэгийн ундаа, жүүс худалдаж авахаа болих. Хоёр, гуравдугаар давхарт амьдардаг бол лифт хэрэглэхээ болихыг зөвлөж байсан. Энэ нь ялангуяа илүүдэл жинтэй, таргалалттай хүүхэдтэй гэр бүлүүдэд хамаатай юм. Эцэг эхчүүд энэ асуудлыг ихэвчлэн дутуу үнэлдэг ч нас ахих тусам сэтгэл зүйн гэмтэл, стресс, сэтгэлийн хямрал, өөрийгөө үнэлэх үнэлэмж муудах, цусны даралт ихсэх, судас хатуурах, чихрийн шижин, тэр ч байтугай үргүйдэлд хүргэдэг гэдгийг тэрээр тэмдэглэв.

Эх сурвалж: “Зууны мэдээ” сонин

2024 ОНЫ АРАВДУГААР САРЫН 24. ПҮРЭВ ГАРАГ. № 206 (7450)