Ч.ГАНТУЛГА

“Нарантуул” захын зүүн хойно байрлах гарцыг хүмүүс “Мангасын ам” гэж нэрлэсээр багагүй хугацаа өнгөрчээ. Тус хаалгаар орж, гарахад согтуу  иргэд олноор бөөгнөрсөн эмх замбараагүй дүр зураг угтдаг.  Үүнээс шалтгаалаад иргэд болон бага насны хүүхдүүд оройн цагаар тус бүсээр зорчихдоо анхаарал болгоомжтой явахыг чухалчилдаг байв.

Тэгвэл  энэ асуудлыг шийдэхээр Хотын дарга Х.Нямбаатар энэ сарын эхээр тус байршилд очиж ажилласан. Үүний үр дүнд өчигдөр тус байршилд цагдаагийн пост ажиллаж эхэллээ.

Энэ талаар нийслэлийн Засаг даргын нэгдүгээр орлогч Н.Мандуул “Есдүгээр сарын 7-нд Хотын дарга энд ирж ажиллахдаа иргэдийн тав тух, аюулгүй байдлыг алдагдуулсан хэсэгт хэв журмыг сахиулах үүрэг өгсөн. Үүний дагуу нийслэлийн Цагдаагийн газар, Баянзүрх дүүргийн Цагдаагийн газраас цагдаагийн постыг богино хугацаанд барьж, орчны аюулгүй байдлыг ханган ажиллаж эхлээд байна. Үүнээс гадна цагдаагийн пост ажиллаж эхэлснээр согтууруулах ундаа хэрэглэсэн иргэдийн асуудал эмх цэгцдээ орно. НЗДТГ-ын зүгээс нийслэлийг хэв журамтай, аюулгүй хот байлгахын төлөө олон ажил төлөвлөсний нэг нь энэ юм” гэлээ. 

Харин “Мангасын ам” орчмын нөхцөл байдлын талаар Цагдаагийн ерөнхий газрын дэд бөгөөд Нийслэлийн Цагдаагийн удирдах газрын дарга, цагдаагийн хурандаа О.Ганбат “Энэхүү цагдаагийн пост нь нэмэх болон хасах 50 хэмд дулаанаа бүрэн барих боломжтой зөөврийн сууц юм. Нийслэлийн Засаг даргаас богино хугацаанд хөрөнгийг шийдэж өглөө. Мөн Баянзүрх дүүргийн ЗДТГ-ынхан орчныг тохижуулах, ойр орчмын том хашаануудыг зөөвөрлөх хөрөнгийг шийдвэрлэсэн. Энэхүү постод  ажиллах найман албан хаагчийг томилсон. Мангасын ам хавийн нөхцөл их хүнд. “Нарантуул” захаас зүүн хойш гардаг ганц гарц бөгөөд явган хүний зорчих хөдөлгөөн автомашинтай хамт явдаг учраас түгжрэл ихтэй. Ойр орчимд архидан согтуурах болон тэнэмэл хүмүүс олноор ирдэг. Үүнийг дүгнэж үзээд Баянзүрх дүүргийн ЗДТГ, Цагдаагийн газраас зохион байгуулалтын арга хэмжээ авч, 30 гаруй хүнийг эмчилгээнд хамруулсан. Цаашид ч ажлыг үргэлжлүүлэхээр төлөвлөж байна. Эдгээр арга хэмжээний үр дүнд иргэдийн аюулгүй байдлыг хангах, тав тухтай орчинд ажиллаж амьдрах нөхцөл бүрдэнэ гэж харж байна. Мөн орчны аюулгүй байдалд анхаарахын тулд камержуулах ажлуудыг хийж шаардлага бий. Гэхдээ үүнийг төр дангаараа хийх бус “Нарантуул” зах нийгмийн хариуцлагын хүрээнд санаачилга гаргаж хамтарч ажиллана гэж найдаж байна” гэсэн юм. Иргэдийн зүгээс олон жил хүнд нөхцөл байдалтай байсан газар ийнхүү цагдаагийн пост байгуулж, орчныг тохижуулсанд талархалтай хандаж буйг Баянзүрх дүүргийн цагдаагийн газрын дарга, цагдаагийн дэд хурандаа П.Нэмэхбаатар хэлж байсан юм.

Түүнчлэн “Мангасын ам”-аас зүүн тийш чиглэлтэй замын нөхцөл байдлыг сайжруулахын тулд замын трассыг баталсан аж. Удахгүй газар чөлөөлнө. Дахин төлөвлөлт нэрийдлээр барьсан стандартын бус замбараагүй барилгуудыг ойрын хугацаанд цэгцлэх ажлыг эхлүүлсэн тухай нийслэлийн Засаг даргын нэгдүгээр орлогч Н.Мандуул хэллээ.

Эх сурвалж: “Зууны мэдээ” сонин

2024 ОНЫ ЕСДҮГЭЭР САРЫН 17. МЯГМАР ГАРАГ. № 180 (7424)