СУИС-ийн Радио, телевиз, медиа урлагийн сургууль, ОХУ-ын С.А.Герасимовын нэрэмжит Бүх Оросын кино урлагийн их сургууль, Эрхүү хотын Техникийн судалгааны үндэсний их сургуультай хамтран “Евроазийн мэдээлэл-харилцааны орон зай: Орчин үеийн ололт, хандлага, ирээдүй” олон улсын эрдэм шинжилгээний хурлыг өчигдөр танхим болон цахим хэлбэрээр зохион байгууллаа.

Тус хурлыг энэ жил дөрөв дэх удаагаа зохион байгуулж байна. Хуралд Монгол, ОХУ, Беларусь, Казакстан гэсэн дөрвөн улсын соёл, урлагийн салбарын 47 эрдэмтэн оролцож, кино урлагийн салбарын хөгжил, цаашдын чиг хандлага, соёл, урлагийн салбарын хамтын ажиллагаа, кино урлаг дахь хиймэл оюун ухааны хэрэглээ, салбар дундын судалгааны онцлог зэрэг олон сонирхолтой сэдвээр илтгэл хэлэлцүүллээ. 

Энэ жилийн хурлыг ОХУ-ын Эрхүү хотын Техникийн судалгааны их сургуулийн “Сэтгүүл зүй, сурталчилгааны тэнхим” удирдан зохион байгуулсан бөгөөд хэл, соёлын асуудлыг хэлэлцсэн салбар хуралдаан явагдсанаараа онцлог боллоо.

Цаашид соёл, урлагийн салбар дахь технологийн хэрэглээ, улс орнуудын кино урлагийн салбарын хөгжлийн онцлог, соёл урлагийн салбар дахь салбар дундын судалгааг хөгжүүлэхэд чиглэсэн асуудлуудыг хэлэлцэхээр  төлөвлөж байна.

Эх сурвалж: “Зууны мэдээ” сонин

2024 ОНЫ ДӨРӨВДҮГЭЭР САРЫН 24. ЛХАГВА ГАРАГ. № 81 (7325)