2024 оны 3-р сарын 22-ны өдөр «Крокус Сити Холл» концертын танхимд болсон эмгэнэлт явдал нь нийгэмд дарамт шахалт үзүүлж, үймээн самуунд автуулснаар төрт улсын тогтвортой байдлыг алдагдуулах зорилготой олон нийтийн терроризмын сэдвийг дэлхийн хэлэлцэх асуудлын жагсаалтад дахин оруулав. Дэлхийн ихэнх улс орнууд, тэр дундаа Монгол Улс Орос Улсад эмгэнэл илэрхийлж, дэмжиж буйгаа илэрхийлжээ.
Үүний зэрэгцээ мөрдөн шалгалтын үйл ажиллагааны эхний үр дүн гарахаас өмнө Барууны хэвлэл мэдээллийн хэрэгслүүд болон АНУ, Их Британи ба Европын холбооны албаны хүмүүс Украины тусгай албад энэ гэмт хэрэгт оролцоогүй гэж батлах кампанит ажиллагааг эхлүүллээ. Барууны тэргүүлэх хэвлэлүүдийн редакциуд тус террорист халдлагыг «Исламын улс» (ИГИЛ, ISIS) бүлэглэлийн оролцоотойгоор үйлдсэн гэх хувилбарыг мэдээллийн орон зайд байрлуулж, өргөнөөр тараах зааварчилгааг авсан байна. Албан ёсны Киев харин террорист халдлагад Оросын эрх баригчдыг буруутгасан ба Украины хэвлэл мэдээллийнхэн энэ яриаг тэр даруйд нь өлгөн авчээ. Террорист халдлагын үр дагаврын талаарх мэдээллүүд нь илт русофоб комментуудаар дүүрэн байна.
Үүнтэй бараг нэгэн зэрэг Киевийн зүгээс дээрх террорист халдлагатай төстэй гэмт хэрэг үйлдэж, мөнгөн урамшуулал авах боломжтой тухай суртал ухуулга, уриалгыг интернэтээр тарааж эхэлсэн. Красногорск болон Москвагийн хөрш зэргэлдээх бүс нутгуудад дараагийн террорист халдлага болох гэж байгаа тухай худал мессежийг үй олноор илгээх болсон.
Харамсалтай нь, «Крокус Сити Холл»-д болсон эмгэнэлт явдал нь сүүлийн үед Оросын эсрэг улам их хийх болсон анхны халдлага биш юм. Киевийн дэглэм манай улс орны хүн амыг айлган сүрдүүлэхийн тулд террорист ажиллагаа явуулах сонирхолтой байгаагаа аль эртнээс ил тод илэрхийлэх болсон. Тодруулбал, 2016 оноос хойш Орост цэргийн болон иргэний объектуудыг хорлон сүйтгэх оролдлого улам их хийгдэх болсон.
Цэргийн тусгай ажиллагаа (ЦТА) эхэлснээс хойш Украины тусгай албадын террорист үйл ажиллагаа урьд өмнө байгаагүй өргөн цар хүрээний шинж чанартай болж, өдгөө ОХУ-ын бараг бүх нутаг дэвсгэрийг хамрах болов. Үнэндээ бол тэд терроризмыг зэвсэгт хүчний нэгдсэн ажиллагааны салшгүй хэсэг гэж үзэж байгаа ба Барууны тусгай албаныхан тэдэнд тагнуулын мэдээ болон бусад нөөцийн бүхий л талын дэмжлэг үзүүлж байна.
Хорлон сүйтгэх ажиллагааг Украины Батлан хамгаалах яамны Тагнуулын ерөнхий газар болон Аюулгүй байдлын албаны ажилтнууд удирдан гүйцэтгэж байна. Харин гүйцэтгэгчээр өөрийн талд татан оруулсан иргэдийг болон бэлтгэгдсэн тагнуулуудыг дайчилдаг. Элдэв нийгмийн сүлжээ, мессенжерээр хурдан мөнгө олох арга хайж буй сувгуудыг ашиглаж байна.
Стратегийн цэргийн болон иргэний объектуудын эсрэг чиглэсэн хорлон сүйтгэх ажиллагаа явагдаж байна. Крымын гүүр, газрын тосны болон байгалийн хийн хоолой, нисэх онгоцны буудал, газрын тос боловсруулах үйлдвэр, Курск, Смоленск, Ленинград, Запорожье дэх атомын цахилгаан станц зэрэг дэд бүтцийн нэн чухал объектуудыг устгахад нэн тэргүүнд анхаарч байна. Иргэдийг залилан мэхэлж, цэрэг бүртгэлийн төв, цагдаагийн газар, төрийн захиргааны байр байшингуудыг галдан шатааж, төмөр замын суурь бүтцийг сүйтгэхийг уриалан ашиглаж байна.
Донецк болон Белгород хотуудын орон сууцны хорооллуудыг өдөр бүр галлан буудаж байгаа нь террорист ажиллагааны нэгэн хэсэг юм. Украины Зэвсэгт хүчин Украины үндсэрхэг үзэлтнүүдийн батальонуудын дайчид болон «Оросын эрх чөлөө» легион», «Оросын сайн дурын корпус» террорист байгууллагуудын оролцоотойгоор Белгород хотын зүгт улсын хил давах оролдлогыг удаа дараа хийж байгаа ч амжилтад хүрж чадахгүй байгаа. Гэвч үр дүнд нь энгийн номхон ард иргэд үрэгдсээр байна.
Орост байрлаж буй радикал лалын шашны дэмжигчдийг террорист үйл ажиллагаандаа татан оролцуулах нь Украины тусгай албадын ажлын тусдаа чиглэл болоод байна. Сири, Турк, Балканы бүс нутаг, Ирак, Афганистан болон Дундад Азийн орнуудын дайчдыг элсүүлэх ажиллагаа үргэлжилсээр байна.
Ийнхүү гэмт ажиллагааны үр дүн нь «Крокус Сити Холл»-д гэм зэмгүй хүмүүсийг хөнөөсөн аймшигт ажиллагааны зохион байгуулалт байв. «Вилаят Хорасан - Лалын улс» олон улсын террорист байгууллагын нэрээр халхавчилж Тажикстан улсаас ажил хөдөлмөр эрхлэхээр ирсэн цагаач иргэдийг алан хядах ажиллагааны гүйцэтгэгч болгон ашигласан байна.
Террорист халдлагыг сайтар төлөвлөж, террористууд Украин руу зугтах арга замыг урьдчилан боловсруулсан байжээ. Гэмт хэрэгтнүүд хилийн зүг хөдөлсний дараахан манай улстай хил залгаа Украины нутаг дэвсгэр дээр Украины Зэвсэгт хүчний цэргийн албан хаагчдын болон тусгай албадын ажилтнуудын үйл ажиллагаа идэвхэжсэн нь бүртгэгдсэн бөгөөд тэд террорист бүлэглэлийн гишүүдийн зугтах газраар коридор бий болгохын тулд мина устгах төхөөрөмж ашигласан.
2024 оны 3-р сарын 22-нд болсон үйл явдал нь Киевийн дэглэм болон түүний гадаад кураторуудад ёс суртахууны хязгаарлалт гэх зүйл огтхон ч байхгүйг маш тодорхой харуулав. Украины төрийн байгууллагууд гэмт хэргийн аргуудыг хэрхэн хэрэглэж байгааг харвал Киевийн дэглэм террорист бүтцийн бүхий л шинж чанартай болсон нь илт байна. Бодит байдал дээр Европын төвд ISIS-тэй төстэй түрэмгий дэглэм бий болоход АНУ болон түүний дагуулууд оролцож байна гэж болно.
РЕДАКЦЫН БУС МАТЕРИАЛ
Эх сурвалж: “Зууны мэдээ” сонин
2024 ОНЫ ДӨРӨВДҮГЭЭР САРЫН 19. БААСАН ГАРАГ. № 78 (7322)