З.БАТЦЭЦЭГ

Европын комиссын даргын өвөө, эмээ нь нацистууд, Адольф Гитлерийг дэмжигчид байсан гэсэн ташаа мэдээлэл олон нийтийн сүлжээгээр тархаж байгаа ч үүнийг батлах нотлох баримт байхгүй байгаа гэж Евроньюс мэдээлжээ.

Европын комиссын ерөнхийлөгч Урсула фон дер Ляйены тухай ташаа мэдээлэл цацагдаж байдаг ч энэ удаад өвөө, эмээ нартай нь холбоотой мэдээлэл гараад байна.

Баримт шалгах явцад 30,000 гаруй удаа үзсэн энэхүү жиргээг Урсула фон дер Ляйений өвөө нь Карл Альбрехт Оберг хэмээх СС-ийн генерал байсан гэж бичжээ.

Тэр жиргээнд анх Польшид алба хааж, еврей, славянуудыг устгах, польшуудыг цэвэрлэх үйлсэд тус дөхөм үзүүлж, улмаар Парист нүүж, Францын эсэргүүцлийн эсрэг тэмцлийг удирдаж, "Еврейн асуудал" гэгдэх хэргийг шийдвэрлэх үүрэг хүлээсэн гэж бичсэн байна. Тэр жиргээнээс үзэхэд шар одонг заавал зүүлгэж, 100 мянга орчим хүнийг үхлийн лагерь руу явуулахыг тушаажээ. Бичлэгийг Урсула фон дер Ляйений эмээ Адольф Гитлертэй гар барьж буйг харуулсан хар цагаан гэрэл зураг дагалдаж байна. Мөн "Хайрт эмээ минь энэ нандин явдлаас хойш нэг сарын турш гараа угаагаагүй" гэсэн тайлбарыг Урсула фон дер Ляйен өөрөө хэлсэн байх магадлалтай талаар бичжээ. Зургийн тайлбарт 1937 оны аравдугаар сарын 3-нд Бьюкебургт Хилдегард Зантоп хэмээх залуу эмэгтэй Гитлертэй хамт байгааг харуулсан байна. Фон дер Ляйений ургийн модыг эргэн харахад түүний эмээ нарын хэн нь ч ийм нэртэй байгаагүй нь тодорхой болж байна. Түүнчлэн  Хильдегард Зантоп фон дер Ляйентэй огт хамаагүй гэж Евроньюс-ийн мэдээнд тэмдэглэжээ.

Түүний өвөө, эмээ нь нацистуудтай ямар нэгэн байдлаар холбоотой байсан гэх хоёулаа худал юм.  Карл Альбрехт Оберг хэмээх СС генерал үнэхээр байсан бөгөөд тэрээр олон мянган еврейчүүдийг Францаас хорих лагерьт албадан гаргах тушаал өгсөн ч тэр фон дер Ляйений өвөө биш байв.

Энэ мэдэгдэл нь түүний өвөө Германы нийтлэг нэр болох Карл Альбрехт гэдэгтэй холбоотой байх магадлалтай. Германы баримт шалгагчдын үзэж байгаагаар энэ Карл Альбрехт 1920-иод онд анагаах ухаанд суралцаж, дайны үед эмчээр ажиллаж байжээ. Тэд түүнийг хэзээ нэгэн цагт СС-ийн гишүүн байсныг нотлох баримт байхгүй гэж хэлсэн.

Зургадугаар сард болох Европын сонгууль дөхөж байгаа энэ үед улс төрийн хүрээний хаана ч байсан улстөрчдийн талаар үнэн зөв мэдээллийг л түгээх нь чухал гэж Евроньюс мэдээлсэн байна.

Эх сурвалж: www.polit.mn