Р.ОЮУН

Монгол Улсын Ерөнхийлөгчийн ивээл дор зохион байгуулж буй "Монголын багш нарын VIII их хурал" хоёр дахь өдрөө үргэлжилж байна. Сургуулийн өмнөх боловсролын салбар хуралдаанд 21 аймаг, нийслэлийн есөн дүүргийн 1410 цэцэрлэгийн 9733 багшийг төлөөлж 178 төлөөлөгч оролцсон бөгөөд тэдний 13 хувь нь хувийн цэцэрлэгт ажилладаг ажээ. Салбар хуралдааны төлөөлөгчид сургуулийн өмнөх боловсролын хөгжлийн чиг хандлага, багшийн хөгжил-хамтын ажиллагаа, хүүхэд бүрийг боловсролд тэгш хамруулах, үйлчилгээний чанар, багшлах хүний нөөцийн хөгжлийн өнөөгийн байдал, тулгамдаж буй асуудал, багш нарын хөгжих хэрэгцээгээр хэлэлцсэн байна. 2023-2024 оны хичээлийн жилд сургуулийн өмнөх боловсролын байгууллагад ажиллагсдын 32.3 хувь нь /9733/ үндсэн багш, 28.5 хувь нь /8592/ туслах багш ажиллаж байгаа нь нийт ажиллагсдын 60.8 хувийг эзэлдэг аж. Сургуулийн өмнөх боловсролын сургалтын байгууллагад ажиллаж байгаа үндсэн багш нарын 12 хувь нь магистр, 75.9 хувь нь бакалавр, дөрвөн хувь нь дипломын боловсролтой, 2020 онтой харьцуулахад магистрын зэрэгтэй багш таван хувиар өсжээ.

Харин мэргэжлийн болон техникийн боловсролын салбарт төрийн болон хувийн өмчийн 69 сургуульд 4168 багш ажиллаж, 38294 суралцагч суралцаж байна. ХНХЯ-ны харьяанд үйл ажиллагаа явуулж байсан мэргэжлийн боловсролын салбар 2022 онд Боловсрол, шинжлэх ухааны яаманд шилжин ирж боловсролын түвшин бүрийн уялдаа холбоог ханган ажиллах боломж бүрдэж, систем бүтэн болсон. Мөн мэргэжлийн болон техникийн боловсролыг үр дүнд суурилсан санхүүжилтийн тогтолцоонд шилжүүлж, байгууллагын засаглал, менежментийг шинэчлэх, сургалтын хөтөлбөр, агуулгыг сайжруулан олон улсын хөтөлбөрийг туршин нэвтрүүлэх, мэргэжлийн боловсролын 2.5 жилийн сургалтын хугацааг гурван жил болгох ажлыг нэвтрүүлж эхлээд байна.   

"Монголын багш нарын VIII их хурал"-ын үеэр үзэсгэлэн гарсан байв.

Эх сурвалж www.polit.mn