С.УЯНГА

Эрдэнэс Монгол нэгдэл, цагдаагийн байгууллагын төлөөлөл Тавантолгой-Гашуун сухайт чиглэлийн авто замын нөхцөл байдалтай танилцаж Өмнөговь аймгийн Ханбогд сумын Цагаан хад суурьшлын бүсэд ажиллалаа. Монгол Улсын  экспортын 90 гаруй хувийг Тавантолгой-Гашуун сухайт чиглэлийн 239 км хүнд даацын авто замаар тээвэрлэж, өдөрт дунджаар 1400-1500 тээврийн хэрэгслээр 100.000 гаруй тонн нүүрс экспортолдог. Стратегийн ач холбогдолтой энэхүү замын хариуцагчаар Эрдэнэс Монгол нэгдлийн бүрэлдэхүүн Гашуунсухайт авто зам компани ажиллаж байна. Өдөрт тус замаар 1400 гаруй тээврийн хэрэгсэл зорчиж байгаагийн 98.5  хувь нь давхар чиргүүлтэй буюу даац хэтэрсэн байдлаар нүүрс тээвэрлэж байна. Тодруулбал, өдөрт 4800 орчим тэвш явж байгаа нь замын эвдрэл, элэгдэлд нөлөөлж байгаа бөгөөд анх хийгдсэн ТЭЗҮ-гээсээ зургаа дахин өссөн тээвэрлэлт хийгддэг гэдгийг мэргэжлийн хүмүүс хэллээ.
Жилд 18 сая тонн нүүрс тээвэрлэх зориулалттай тус авто зам анх хүлээж авахад зургаан см зузаантай байсан бол  2023 онд хийсэн дөрвөн багц урсгал засварын хүрээнд 52.8 хувьд нь 12 см зузаантай хучилт хийжээ. Ийнхүү жил бүр хөрөнгө оруулалтын асуудал хэвийн үргэлжилбэл хоёр жилийн дараа 239 км 12 см зузаантай асфальтан болох бүрэн боломжтой аж.

Өнгөрсөн  онд Эрдэнэс Монгол нэгдлийн хэмжээнд 35.1 сая тонн нүүрс тээвэрлэж, Монгол Улсын валютын нөөцийн 70 хувийг бүрдүүлж түүхэн амжилт тогтоосон нь тээврийн нэвтрүүлэлт эрчимжсэнтэй холбоотой. Тээврийн менежментийн төлөвлөлт, зохион байгуулалтын зөв менежментийг хийж, тоног төхөөрөмжийн шинэчлэл, бүртгэл мэдээллийн программ хангамж, техник хэрэгсэл шинэчлэгдэж долоон систем, найман сервис ажилласнаар тээврийн хэрэгслийн шалган нэвтрүүлэлтэд 2-3 минут шаарддаг байсан бол 15-20 секундэд нэвтрүүлэх хурдны хүчин чадал нэмэгджээ. Энэ үеэр Өмнөговь аймгийн Цагдаагийн газар, Гашуунсухайтын Гэрээт цагдаагийн хэлтсийн дарга О.Чинзориг “Ирэх зургаадугаар сард багтаж тээврийн хэрэгслийн дундаж хурдыг хэмжих камер тавина. Өдөрт дунджаар 1500, 600 орчим тээврийн хэрэгсэл хөдөлгөөнд оролцож байна. Ачаалал ихтэй үед 2000 давдаг. Тээврийн хэрэгслийн жолооч нарын ганц асуудал бол тухтай зогсоол, хоол идэж амардаг байр байх шаардлагатай. Тиймээс үүнтэй холбогдуулан хоёр цэгт эхний ээлжинд амрах зогсоол талбайг тохижилт үйлчилгээний газар­тай нь барья гэж ярьж байна” гэлээ. 

Эх сурвалж: "Зууны мэдээ" сонин