Рагчаа Оюун

Ерөнхийлөгчийн санаачилгаар "Ойн салбарын үндэсний II чуулган" Төрийн ордонд боллоо. Энэ үеэр БОАЖ-ын сайд Б.Бат-Эрдэнэ “Монгол орны ойн өнөөгийн байдал, салбарын бодлого” сэдвээр илтгэл танилцуулсан юм.

Тэрбээр "Уур амьсгалын өөрчлөлт хүн төрөлхтөн цаашид оршин тогтнох уу гэдэгт яагаад хүрсэн бэ гэдгийг бид бодох хэрэгтэй болжээ. Сүүлийн 80 жилд юу болсон бэ. Агаарын дундаж температур 2.4 хэмээр нэмэгдсэн. Дэлхийн дулаарлын үр нөлөө Монгол Улсад хамгийн их орж ирж байгаа. Монгол Улсын нэг хүнд ногдох хүлэмжийн хийн ялгарал дэлхийн дунджаас 2.7 дахин өссөн. Газрын доройтол нэн хүчтэй, хүчтэй, сул. Цэвдгийн тархалт бүхий талбай 18.7 хувиар буурсан, гамшгийн давтамж хоёр дахин өссөн. Харин нөгөө талд ойгоор бүрхэгдсэн талбайн хэмжээ “Тэрбум мод” үндэсний хөдөлгөөн өрнөснөөр нэмэгдсэн. Түймэрт өртсөн талбай 49.2 хувиар буурсан нь энэ хөдөлгөөний үр дүн.

Ойн ашиглалтын өнөөгийн байдлын тухайд 2014-2023 онд жилд дунджаар 736.9 мянган метр куб модыг ашиглажээ. Жил тутамд 810 мянган ширхэг модыг хэрэглэж байна гэсэн үг. Үүнээс 74.9 хувийг дулааны үйлдвэрлэл буюу түлээндээ хэрэглэж байна. Үүнийг өөр түвшинд хүргэхгүй бол цаашид байж болохгүй. Дэлхийн дулааралтай холбогдуулаад мод яаж ургах вэ, яаж илүү их хэмжээгээр ургуулах вэ гэдэг агуулга чухал байна. Цэвдэг хайлсаар байна. Цаашид бид юу хийх вэ. Яаж эко системийг хадгалж авч үлдэх вэ гэдгийг Засгийн газар, Ерөнхийлөгчийн манлайлал дор өнөөдөр бид хөндөж байна. 2080 он хүртэл агаарын температур 6.2 хувиар нэмэгдэнэ, цэвдгийн хайлалт дахин үргэлжилнэ гэсэн үг” гэсэн юм.

Өсвөрийн байгаль хамгаалагч Булганы Хялганат тосгоны Ерөнхий боловсролын сургуулийн 10а ангийн сурагч Д.Буянжаргал, анги удирдсан багш С.Сугарын хамт Ерөнхийлөгчтэй зурагаа татууллаа.

Ерөнхийлөгч өсвөрийн байгаль хамгаалагчид амжилт хүслээ.

Эх сурвалж www.polit.mn