Н.Жаргалмаа

Өнөөдөр Украины Ерөнхий сайд Денис Шмихалыг Токиод айлчилж сэргээн босголтын асуудлаар хэлэлцэж, хоёр улсын хоорондын татварын шинэ гэрээ байгуулж бизнес эрхлэгчдэд дэмжлэг үзүүлэхээр хэлэлцээрийг хийж байна.

Японы Ерөнхий сайд Фумио Кишида дээрх хэлэлцээг нээж хэлсэн үгэндээ “Япон улс Украины талд байсан, байсаар ч байгаа” хэмээн хэлж гурав дахь жилдээ үргэлжилж буй тус эзлэн түрэмгийлэлд Киевийн хүчин чармайлттай эв санааны нэгдлээ илэрхийлж 10 тэрбум гаруй ам.долларын санхүүгийн тусламж үзүүлэхээ амлалаа. Япон улс нь дайны байдалтай орнуудад зэвсэг тээвэрлэх хязгаарлалттай учир Украинд шууд цэргийн дэмжлэг үзүүлэх боломжгүй юм. Украины Ерөнхий сайд Денис Шмихал орчуулагчаараа дамжуулан Япон улсын үзүүлж буй дээрх туслалцаа дэмжлэгийг “Украин хэзээ ч мартахгүй” гэв. Энэхүү Украины сэргээн босголтын хэлэлцээр, татварын гэрээ нь Японы томоохон автомашин үйлдвэрлэгчид, бизнес эрхлэгчдэд болон хоёр улсын харилцаанд шинэ хуудас нээж байна хэмээжээ.

Сэргээн босголтын уулзалтын үеэр ерөнхий сайд Кишида “Япон улс Украины компаниудын дэмжиж, визний хяналтыг хөнгөвчилнө” хэмээн амласан байна. Түүнчлэн Японы засгийн газрын “JETRO” агентлаг Киевт шинэ салбар оффис нээх болсон талаар мэдээллээ. Ингэснээр дан ганц бизнес эдийн засгийн салбар бус хөдөө аж ахуй, эрчим хүч зэрэг салбаруудад хамтын ажиллагааг өргөжүүлэх боломж бүрдэж байна. Украины Сангийн сайд Сергей Марченко хэвлэлийн бага хурал дээр “Бидний туулж буй энэ хүнд цаг үед үргэлж хамт байж дэмжсээр ирсэн цорын ганц түнш бол Япон улс билээ” гэжээ.

www.polit.mn