Б.Нандин

Бүгд Найрамдах Казахстан улсын ерөнхийлөгч К.Токаев засгийн газрын тэргүүний огцрох хүсэлтийг хүлээн авснаа даваа гарагт мэдэгдлээ. Ингэснээр тус улсын засгийн газар бүрэн бүрэлдэхүүнээрээ огцорч, шадар сайд Роман Склаяр ерөнхий сайдын үүрэг гүйцэтгэгчээр түр томилогджээ. Шинэ танхим бүрдтэл одоогийн сайд нар үүрэг гүйцэтгэгчээр ажиллах болжээ.

БНКУ-ын хувьд өмнөх ерөнхийлөгч Н.Назарбаевын үеэс л төрийн тэргүүн нь үнэмлэхүй эрхтэй гэдгээрээ онцгойрдог байсан. Хэдийгээр одоогийн ерөнхийлөгч К.Токаев санаачлан өнгөрсөн жил Үндсэн хуульдаа өөрчлөлт оруулснаар ерөнхийлөгчийн эрхийг хязгаарласан гэдэг ч эрх мэдэл өндөр хэвээр байна гэж олон улсын хэвлэлүүд бичиж байна. Ерөнхийлөгчийн ажлын албанаас засгийн газар огцрох болсон шалтгааныг тодорхой мэдээлээгүй. Үүнийг сүүлийн үед тус улсад өрнөж байгаа өөрчлөлт шинэчлэлтэй холбоотой хэмээн хэвлэлүүд таамаглаж байна. Учир нь К.Токаев сүүлийн үед гадаадын хөрөнгө оруулалттай холбоотой асуудалд шинэчлэлт хийх талаар шийдэмгий байр суурьтай байсан юм.