“Polit” хуанли: “Төрсөн өдөр” буландаа нэгдүгээр сарын 29-нд төрсөн эрхмүүдээс АНУ-ын 25 дахь ерөнхийлөгч Виллиам МакКинлиг онцолж байна.

Виллиам МакКинли нь нь 1843 оны нэгдүгээр сарын 29-нд АНУ-ын Охайо мужид мэндэлсэн. Тэрбээр ерөнхийлөгч болохоосоо өмнө Охайо мужийн захирагчаар ажиллаж байжээ. 1897 онд АНУ-ын 25 дахь ерөнхийлөгчөөр сонгогдсон бөгөөд 1900 онд хоёр дахь бүрэн эрхийн хугацаагаа эхлүүлжээ. Харамсалтай нь хоёр дахь удаа сонгуульд ялалт байгуулснаас ердөө зургаан сарын дараа Нью-Йорк хотноо бусдын гарт амиа алдсан байна. 1900-аад оны эхэн үе буюу МакКинлиг ерөнхийлөгч болох үед АНУ эдийн засгийн гүн хямралд нэрвэгдсэн байсан бөгөөд түүний засаг захиргааны үед байдал эрчимтэй сэргэж, эдийн засаг хурдацтай өссөн хэмээн үздэг.

Шинэ ерөнхийлөгч үйлдвэрлэгчдийг гадаадын өрсөлдөөнөөс хамгаалах тусгай тариф гэгчийг баталснаар инфляцийг тогтоон барьж, үр дүнтэй ажилласан нь түүний хамгийн гол амжилт юм хэмээн намтарт нь онцгойлон бичсэн байна. Гадаад харилцааны хувьд түүнийг эрх барьж байх үед Испани-Америкийн дайн болсон бөгөөд АНУ-ын ялалтаар төгсч, Пуэрто Рико, Гуам, Филиппин зэрэг Испанийн колони үндэстнүүдийг өөрийн болгож авсан байна. Мөн 1898 онд АНУ Хавайн вант улсыг АНУ-ын нутаг дэвсгэр болох гол хэлцлийг тэрбээр гүйцэтгэсэн байна. 1901 оны есдүгээр сарын 6-нд хоёр дахь бүрэн эрхийн хугацаагаа эхэлснээс зургаан сарын дараа түүнийг Нью-Йорк хотноо ажиллаж байх үед нь Леон гэгч этгээд олны дундаас гэнэт бууджээ. Буудуулснаасаа хойш найм хоногийн дараа ерөнхийлөгч Виллиам насан эцэслэжээ. 25 дахь ерөнхийлөгчийг түүний дэд ерөнхийлөгчөөр ажиллаж байсан Theodore Roosevelt залгамжилжээ.

Эх сурвалж: www.polit.mn