Н.Жаргалмаа

Жил бүр уламжлал болгон зохион байгуулагддаг Дэлхийн эдийн засгийн форум 54 дэх удаагаа Швейцарын Давос хотод зохион байгуулагдаж байна.

Энэ жилийн дээд хэмжээний уулзалтад дэлхийн 100 гаруй орны засгийн газар, бизнесийн мянга гаруй төлөөллүүд "Итгэлцлийг сэргээх" сэдвийн хүрээнд чуулна. Ингэхдээ итгэлцлийг бий болгоход шаардагдах ил тод, тууштай, хариуцлагатай байдлыг сайжруулахад голлон анхаарах юм.

2024 оны Давосын чуулга уулзалтаар “Хиймэл оюун ухаан ба аюулгүй байдал”-ын асуудлыг нарийвчлан хэлэлцэх юм. Тодруулбал, хиймэл оюун ухааны талаар бодлого боловсруулагчид, салбарын удирдагч, хөрөнгө оруулагч, эрдэмтдийн хамтарсан “AI House Davos”-ыг байгуулахаар болсон юм. Энэ талаар шинэхэн байгуулагдсан тус байгууллагын хэвлэлийн төлөөлөгч “2024 оны чуулганы голлох сэдэв хиймэл оюун ухаан гэхэд буруудахгүй. Учир нь улс төр, бизнесийн удирдагчдын үзэж буйгаар энэхүү асар хурдацтай хөгжиж буй технологийг анагаах ухаан, бизнесийн салбарт  хэрхэн ашиглах талаар хэлэлцэж, шинэ санал санаачлагыг хөгжүүлэх хөрөнгө оруулалтыг тодорхойлох хэрэгтэй. Мөн хиймэл оюун ухааны зохицуулалт, инноваци, туршилт хоорондын тэнцвэрт байдлын хангах орчныг бүрдүүлэх шаардлагатай хэмээн үзэж байна” гэжээ.

Эх сурвалж: www.polit.mn