П.АМГАЛАН

“Polit” хуанли: “Төрсөн өдөр” буландаа нэгдүгээр сарын 13-нд төрсөн өдөр  нь тохиож буй  "Карибын тэнгисийн дээрэмчид", "Бөгжний эзэн", "Трой" киногоороо алдарт хүрсэн  Америкийн жүжигчин Орландо Блүүмийг онцолж байна. Тэрбээр  1977 оны энэ өдөр төржээ.

“Миний өмнө олон зам байсан ч кино урлагийг сонгосон”

Орландо Блүүм бол Холливудын алдарт жүжигчин. Тэрбээр олон киноны дүрд ажилласан ч  түүнийг дэлхийд таниулсан дүр бол яах аргагүй Карибын тэнгисийн дээрэмчид" киноны  Уилл Төрнер.  “Карибын тэнгисийн дээрэмчид"-ийн Уилл Төрнерийн дүрд  Jude Law, Heath Ledger, Ewan McGregor зэрэг олон алдартныг тоглуулахаар яригдаж байсан ч “Бөгжний эзэн” кинонд амжилттай тоглоод байсан Орландо Блүүмийг сонгосон байдаг.

Тэрбээр энэ дүрийнхээ тухай ELLE” сэтгүүлд өгсөн ярилцлагадаа “Далайн дээрэмчин бол маш сонирхолтой шүү дээ. Надад их боломж олдож байгааг би мэдэрсэн. Магадгүй үүнд Жонни Депп маш их нөлөөлсөн. Кейт Ричардс далайн шорвог ус ууж байхыг хараад үнэхээр гайхаж байлаа. Тэр надад хандаж хэлэхдээ “Далайн ус амттай” гэсэн. Энэ үнэн шүү. Киноны зохиолыг нь уншаад л надад таалагдаж, хуудас бүрийг эргүүлэхэд сонирхол татаж байсан. Та зохиолыг нь уншсан бол алмайрах байсан даа. Барууны буруу хэв маягтай хүмүүс, ид шид болон язгууртнууд гээд сонирхолтой үйл явдалд чадварлаг жүжигчдийн баг бүрдсэн. Би бүр Жоннитой хамтран тоглох гэж байгаадаа итгэж ядсан. Тэр үнэхээр хөгжилтэй болохоор киног дэлгэцэнд амилуулсан” хэмээсэн байдаг.  Ийнхүү зохиолыг нь уншихад өөрт  нь гайхалтай мэдрэмж төрүүлж чадсан  "Карибын тэнгисийн дээрэмчид" кино түүнийг дэлхийд таниулсан бүтээл болж чаджээ. Мөн тэрбээр “ Миний өмнө олон зам байсан” хэмээн ярилцлагадаа дурдаж байв. Ийнхүү 6-7 жил урлагийн сургуульд сурч, 27 настайдаа хүссэн нэр хүндээ олж чаджээ.

Орландо Блүүмийн хувийн амьдрал

Тэрбээр 2010 онд  Victorias Secret брендийн сахиусан тэнгэр гэгдэх загвар өмсөгч Миранда Керр (Miranda Kerr) –тэй  гэрлэсэн юм. 

Загвар өмсөгч  Миранда Керр  2015 оны  хамгийн өндөр орлоготой (5.5 сая доллар) загвар өмсөгчдийн   зургадугаарт бичигдэж байв. Мөн тэрбээр “Escada”, “Swarovski”, “Clear” зэрэг брэндийн нүүр царай юм. Тэд гэрлэж, хүүтэй болсон ч  гурван жилийн дараа салсан.

Дараа нь 2016 оноос поп од дуучин,  Кети  Перритэй болзож эхэлсэн нь олны анхаарлыг татаад байв. Тэд 2019 онд албан ёсоор гэрлэлтээ батлуулж, 2021 оны наймдугаар сард охинтой болсон юм. Тэд охиныг Дейзи Блүүм гэдэг.

Орландо Блүүм ийнхүү хоёр амьдралаа эхлүүлсэн ч өмнөх эхнэр Миранда Керр түүний шинэ эхнэр дуучин,  Кети  Перри нар хоорондоо сайн харилцаатай байдаг аж. Загвар өмсөгч  Миранда Керр гоо сайхан, эрүүл мэндийн бүтээгдэхүүн үйлдвэрлэдэг  "Кора Органикс" компанийн үүсгэн байгуулагч бөгөөд тэрбээр шинэ бүтээгдэхүүний дээжээс Кети Перрид явуулдаг байна. Харин Кети  Перри бүтээгдэхүүнийг хэрэглэж, сэтгэгдлээ хуваалцдаг аж.

Эх сурвалж:www.polit.mn