Базарбямбын НЯМСҮРЭН

Францын ерөнхийлөгч Э.Макрон шинэ Засгийн газрын тэргүүнээр Габриель Атталийг томиллоо. Тус улсын хоёр дахь эмэгтэй Ерөнхий сайд Элизабет Борне даваа гарагт ажлаас чөлөөлөгдөх өргөдлөө өгснөөс хоёр хоногийн дараа залуу Ерөнхий сайд ажлаа авч байгаа юм.

Тэгвэл 34 настай, дөнгөж өнгөрсөн жил Боловсролын сайдаар томилогдон ажиллаж байсан Габриель Аттал гэж хэн болох талаар тоймлон хүргэе.

1989 оны гуравдугаар сарын 16-нд Франц улсын Кламарт хотноо төрсөн Габриэль Аттал нь улс төрд харьцангуй залуудаа хөл тавьсан гэж болно.

17 насандаа Renaissance намд элсэж, Эрүүл мэндийн яамны зөвлөхөөс ажлын гараагаа эхэлсэн тэрбээр 19 насандаа Францын ард түмний ассамблейд сонгогдож байсан тухай намтарт нь бий.

Энэ хугацаанд Засгийн газрын хэвлэлийн төлөөлөгч, Боловсролын яамны дэд сайд, сайд зэрэг албан тушаалуудыг хашиж байсан улс төрийн туршлагатай. Тиймээс ч түүнийг Ерөнхий сайдаар томилогдоход “Ерөнхийлөгч Э.Макроны залуу үеийг санагдуулж байна”, “Францын улс төр дэх залуу од” хэмээн хэвлэлүүд бичиж байна. 

Тухайлбал, парламентын гишүүн Патрик Вигнал “Макрон Францын түүхэн дэх хамгийн залуу төрийн тэргүүн болж байсан үеийг санагдуулж байна. Габриель Аттал 2017 оны Макронтой төстэй юм” хэмээжээ.

Францын хуулийн дагуу ерөнхийлөгч Засгийн газрын тэргүүнийг томилдог. Ерөнхийлөгч Э.Макрон танхим дахь хамгийн залуу сайдыг дэвшүүлэн томилсон нь ирэх зургаадугаар сард болох Европын парламентын сонгуулийн өмнө нэр хүндээ өсгөж байгаа томоохон алхам боллоо хэмээн хэвлэлүүд үзэж байна. Учир нь сүүлийн үед Францад өрнөөд байгаа тэтгэврийн өөрчлөлт, цагаачлалын асуудлаас үүдэлтэй олон нийтийн шүүмжлэл тасрахгүй хэвээр байна. Тиймээс ч шүүмжлэлийн үед томилогдсон шинэ Ерөнхий сайд дунд давхаргынхны орлогыг тогтвортой байлгах чиглэлээр түлхүү ажиллавал амжилт олох магадлалтай.

Одоогоор Засгийн газрын бүрэлдэхүүнийг хараахан зарлаагүй байгаа ч энэхүү шинэ Засгийн газар 2027 онд болох Ерөнхийлөгчийн сонгууль хүртэл тогтвортой үйл ажиллагаа явуулах, Э.Макроны бодлогоо хэрэгжүүлэхэд томоохон дэмжлэг үзүүлэхэд гол нөлөө үзүүлэх нь тодорхой.

Аль Жазирагийн тоймч Батлер “Аттал бол чадварлаг, харилцааны чадвар  өндөртэй, амбицтай улстөрч. Францын ерөнхийлөгч Эммануэль Макрон парламентад олонхийн дэмжлэггүй байгаа энэ үед шинэ Ерөнхий сайдад ерөнхийлөгч, парламент болон Засгийн газрын аль аль талыг нэгтгэж ажиллах нь томоохон сорилт байх болов уу” хэмээн дүгнэсэн байна.

Дашрамд дурдахад, Габриель Аттал ижил хүйстэн гэдгээ нээлттэй зарласан, Францын анхны Засгийн газрын тэргүүн юм. Тэрбээр Европын холбооны парламентад Францыг төлөөлөн сонгогдсон Стефани Сежюрнитэй хамтран амьдарч байжээ.

Эх сурвалж: “Зууны мэдээ” сонин

2024 ОНЫ НЭГДҮГЭЭР САРЫН 11. ПҮРЭВ ГАРАГ. № 7 (7251)