Б.Нандин

Япон Улсын  Ишикава мужийн Ното бүс орчимд шинэ оны эхний өдөр магнитудын долоон баллд хүрсэн хүчтэй газар хөдлөлт боллоо. Одоогоор энэхүү гамшигт үйл явдлын улмаас 30 гаруй хүн амь насаа алдаад байна. Ишикава мужийн  зарим суурин газарт байшин барилга нурж, цахилгаан эрчим хүч тасарч, зарим хот, тосгонд хий, ундны ус тасарсан байна. 

Газар хөдлөлт хамгийн хүчтэй болсон Ишикава мужид 123 монгол иргэн оршин суудаг. Ишикава мужтай хиллэх Тояма мужид 111 хүн, Фүкүй мужид 43 хүн тус тус оршин сууж байна. Монгол Улсаас тус улсад суугаа ЭСЯ-ны зүгээс монголчууддаа хандан сэрэмжлүүлэг гаргажээ.

Манай улсын иргэдийн зүгээс гамшигт өртсөн тухай мэдээ одоогоор ирээгүй байгаа бөгөөд ГХЯ-ны Консулын газар болон Токио дахь ЭСЯ, Осака дах Ерөнхий консулын газрын зүгээс нөхцөл байдалд шуурхай арга хэмжээ авч ажиллаж байна. 

Япон улсад суугаа манай улсын иргэд яаралтай нөхцөлд Токио хот дахь ЭСЯ-ны шуурхай утас: +81 9033191397, Осака дахь Ерөнхий Консулын газрын шуурхай утас: +81 649632572 дугаараар холбогдох боломжтой хэмээн ГХЯ-наас мэдээлэв.